पेरिस (एजेन्सी)– नेयमार जस्ता विश्वस्तरीय खेलाडी पेरिस सेन्ट जर्मेन (पिएसजी) लाई आवश्यक रहेको टोलीका कप्तान थिएगो सिल्भाले बताएका छन् । विश्व कीर्तिमानी रकममा नेयमार बार्सिलोनाबाट पिएसजी जान सक्ने सम्भावनाका बीचमा सिल्भाको यस्तो भनाई आएको हो ।
बार्सिलोनामा धेरै जसो समय लियोनल मेस्सी र लुइस सुआरेजको छायाँमा पर्ने गरेका नेयमार फ्रेन्च टोलीमा पुगे भने त्यहाँको नम्बर एक स्टार रहने पक्का छ। सन् २०१२ देखि पिएजसीबाट खेल्दै आएका सिल्भाले सरुवाका विषयमा ब्राजिलियन सहकर्मी नेयमारसँग अझै कुरा गरेका छैनन्। तर पनि नेयमारजस्तो खेलाडी भित्राउन सके त्यो क्लबका लागि उपयुक्त हुने बताउँछन्।
प्रि सिजनमा रोमासँगको मैत्रीपूर्ण खेलपछि उनले सञ्चारकर्मीसँग भने,‘ मलाई यो विषयमा खास थाहा छैन। यदि नेयमार आउने भए भन्ने मलाई उनले भन्दैनन्। पिएसजीका लागि नेयमार जस्ता खेलाडी महत्वपूर्ण हुन्छन्। यदि त्यो सम्भव भयो भने समूहका लागि राम्रो हुनेछ। ’
नेयमार भित्राउन सके पिएसजीले च्याम्पियन्स लिग उपाधि जित्ने सम्भावना बलियो हुने अनुमान गरिएको छ। टोली अहिले सम्म युरोपियन क्लब च्याम्पियन बन्न सकेको छैन। गत सिजन टोलीले फ्रास्नेली लिग १को उपाधि पनि जित्न सकेन।’
