अमेरिका (एजेन्सी) – बार्सिलोनाका भरपर्दा डिफेन्डर जेरार्ड पिकेले ब्राजिलियन फरवार्ड नेयमार अर्को सिजन बार्सिलोनामै रहने दाबी गरेका छन्। नेयमार पिएसजी जाने हल्ला व्यापक फैलिएसँगै पिकेले आफ्नो सामाजिक संजालमार्फत यस्तो अभिव्यक्ति दिएका हुन्।
केहि दिन अघि भएको बार्सिलोना र युभेन्टसको खेलमा २ गोल गरेका २५ वर्षीय नेयमारले भने हालसम्म आफ्नो भविष्यबारे केहि बोलेका छैनन्। तर, नेयमारका समकक्षी डिफेन्डर पिकेले सामाजिक संजालमा दुइ खेलाडीको फोटो राख्दै ‘उनि बस्छन्’ भनेर लेखेका छन्।
यता बार्सिलोनाका प्रशिक्षक एर्नेस्टो भालभेर्डेले नेयमार बार्सिलोनाकै खेलाडी रहेको बताए। ‘नेयमार अहिले हाम्रो साथमै छन्। उनि हामीसबैले मन पराउने र नभई नहुने खेलाडी हुन्। उनि मैदानभित्र मात्र नभएर टोलीमा एकदम रमाइला खेलाडी पनि हुन्।‘
‘यो सब हल्ला हो। हामीले यसबारे केहि चिन्ता लिनुपर्ने जस्तो हामीलाई लागेको छैन। भविष्यमा के हुन्छ त्यसबारे म भन्न सक्दिन तर यो समयमा भने नेयमार टोलीकै सदस्य छन् र रहनेछन्।’
बुधबार हुने बार्सिलोना र म्यानचेस्टर युनाइटेडको खेलमा नेयमारले पहिलो रोजाईमा खेल्ने पनि बुझिएको छ।
