दिपेश तिमलसिना
सिंगापुर – प्रि-सिजनको मैत्रीपूर्ण खेल अन्तर्गत सिंगापुरको राष्ट्रिय रंगशालामा भएको खेलमा जर्मन च्याम्पियन बायर्न म्युनिखले इङ्गलिस च्याम्पियन चेल्सीलाई ३-२ले पराजित गरेको छ।
खेलको छैटौं मिनेटमा राफिन्हाले गोल गर्दै बायर्नलाई खेलमा अग्रता दिलाएका थिए। उनले बक्सबाहिरबाट गरेको प्रहारलाई गोलरक्षक थिबाउ कोर्टुवाले रोक्ने कुनै मौका पाएनन्। लगत्तै १२औं मिनेटमा थोमस मुल्लरले गोल गर्दै बायर्नको अग्रता दोब्बर पारेका थिए। मुल्लरले २७औं मिनेटमा व्यक्तिगत दोश्रो गोल गर्दै टोलीलाई ३-०को अग्रता दिलाएका थिए। मुलरले करिब २० यार्ड टाढाबाट प्रहार गरेको सट गोलरक्षकलाई बिट गरेर सिधै गोल भएको थियो। चेल्सीका लागि पहिलो हाफको अन्तिम समयमा मार्कस अलोन्सोले गोल गर्दै अग्रता घटाए। उनले रिबाउन्डमा आएको बललाई कडा प्रहर गर्दै खेललाई २ गोलको फरकमा झारेका थिए।
दोश्रो हाफमा बायर्नले थप अवसरहरु सिर्जना गरेपनि गोल गर्न भने असफल रह्यो। बायर्नका लागि हामेस रोड्रीग्वेजले निकै अवसर पाएपनि त्यसको सदुपयोग गर्न चुकेका थिए। चेल्सीले खेलको ८५औं मिनेटमा अर्को गोल गर्दै खेलमा फर्कने प्रयास गरेको थियो। चेल्सीका लागि फरवार्ड मिसी बासुआइले सेस फाब्रेगासको क्रसलाई अल्भारो मोराटाले फ्लिक गरेर पास मिलाएपछि गोल गरेका थिए।
पछिल्लो खेलमा एसी मिलानसँग ४-०ले पराजित भएको बायर्नले चेल्सीलाई पराजित गरेको हो। बायर्नले बुधबार हुने खेलमा इन्टर मिलानको सामना गर्नेछ। यसैगरि चेल्सीले पछिल्लो खेलमा आर्सनललाई पराजित गरेको थियो।
