अमेरिका (एजेन्सी) – स्पेनिस क्लब बार्सिलोनाका डिफेन्डर पिकेले क्लबका फरवार्ड नेयमारको भविष्यबारे आफु अनभिज्ञ रहेको बताएका छन्। पिकेले केहि दिन अघि सामाजिक संजालमा फोटो हाल्दै नेयमार बार्सिलोनामै बस्ने बताएका थिए। तर, अहिले उनले उक्त पोष्ट आफ्नो सुभेच्छा भएको बताएका छन्।
पिकेले पत्रकार सम्मेलनमा नेयमार बस्ने-नबस्ने पक्का अझै नभएको बताए। ‘मलाई नेयमार बस्छन वा जान्छन थाहा छैन तर मैले नेयमारसँग गरेको कुराकानी अनुसार आफैं बुझेर उक्त पोष्ट गरेको हुँ। म नेयमार क्लबमै बसुन भन्ने चाहन्छु।’
‘मैले लेखेको कुनै औपचारिक समाचार थिएन। नेयमारलाई मात्र थाहा छ उनको भविष्य के हुनेछ तर मेरो चाह भनेको उनलाई क्लबमै रहेको हेर्ने हो। मैले आफ्नो साथी र सहकर्मीका रुपमा सक्ने सल्लाह दिएको छु। मैले कुनै हालतमा पनि उनलाई यहाँभन्दा नराम्रो लिगमा जान सल्लाह दिन्न।’
बार्सिलोनाले बुधबार हुने खेलमा म्यानचेस्टर युनाइटेडको सामना गर्दैछ। खेल नेपाली समयानुसार बिहिबार बिहान हुनेछ।
