म्याड्रिड (एजेन्सी) – गए राति ला लिगामा रियल म्याड्रिडले इस्पानियोललाई २-० ले हराउँदै घरेलु मैदानमा सिजनको आफ्नो पहिलो जित दर्ता गरेको छ । रियल म्याड्रिडको जितमा इस्कोले दुई गोल गरेका थिए ।
रियल म्याड्रिडले पहिलो हाफमा निकै आक्रामक सुरुवात गरेको थियो । इस्को, क्रिस्टियानो रोनाल्डो र लुका मोड्रिचका राम्रा प्रहारहरु इस्पानियोलका गोलकिपर पाउ लोपेजले बचाऊ गरेका थिए । तर रोनाल्डोको थ्रु-बलको सदुपयोग गर्दै इस्कोले ३० औँ मिनेटमा रियललाई खेलमा अग्रता दिलाएका थिए ।
दोस्रो हाफमा भने इस्पानियोल बराबरीको खोजीमा उत्तिकै आक्रामक देखिएको थियो । उनका फरवार्ड जेरार्ड मोरेनोको प्रहार पोस्टमा लागेर फर्केको पनि थियो । तर मार्को एसेन्सियोको पासमा खेलको ७१ औँ मिनेटमा आफ्नो दोस्रो गोल गर्दै उनले रियलको जित सुनिश्चित पारेका थिए ।
यस जितसँगै रियल म्याड्रिड ७ खेलमा १४ अंक बटुल्दै तालिकाको पाँचौ स्थानमा छ । रियलको प्रतिद्वन्दि बार्सिलोना भने २१ अंकसहित शीर्ष स्थानमा रहेको छ । त्यस्तै हारसँगै इस्पानियोल अंकतालिकाको एघारौँ स्थानमा झरेको छ ।
