लन्डन (एजेन्सी) – प्रिमियर लिगका पूर्व खेलाडी तथा हाल स्काई स्पोर्ट्सका विश्लेषक टोनी गेलका अनुसार टोटेनह्याम हटस्पर्सका स्ट्राइकर ह्यारी केन नेयमारभन्दा मूल्यवान रहेको र इङ्लिस क्लब स्पर्सलाई नबेच्ने सुझाव दिएका छन् ।
हालै चलेको हल्ला अनुसार रियल म्याड्रिड केनलाई भित्राउन तयार रहेको र २ सय मिलियन पाउण्डसम्म तिर्न तयार रहेको छ । फुल्ह्याम तथा वेस्ट ह्यामका पुर्व डिफेन्डर गेलका अनुसार केन नेयमारभन्दा धेरै मूल्यवान छन् । उनका अनुसार केनलाई भित्राउन कुनै पनि क्लबले नेयमारलाई पिएसजीले तिरेको १ सय ९८ मिलियन पाउण्ड भन्दा धेरै तिर्नु पर्ने छ ।
‘केनलाई बेच्नु मुर्खता हुनेछ । उनी स्पर्सको खेल्ने शैलीमा फिट खेलाडी हुन् , त्यसैले उनलाई बेच्नुभन्दा स्पर्सले उनको वरिपरि राम्रा खेलाडी राखेर बलियो टोली बनाउन जरुरी छ ‘ , गेलले भने ‘उनी गोल गर्न सक्ने खेलाडी हुन् । उनी नेयमार भन्दा धेरै मूल्यवान छन् ।
२४ वर्षीय केनले प्रिमियर लिगमा स्पर्सबाट १ सय २० खेलमा ८४ गोल गरेका छन् । सन् २०१५ मा पहिलो पटक इङ्ल्याण्डको टोलीमा स्थान बनाएका केनले त्यसयता २१ खेलमा १० गोल गरेका छन् ।
