बेल्फास्ट (एजेन्सी) – विश्व कप फुटबलको साविक विजेता जर्मनी छनोट चरण अन्तर्गत नर्दन आयरल्यान्डको सामना गर्दै छ । समूहको शिर्षस्थानमा रहेको जर्मनीलाई आजको खेलमा बराबरी पर्याप्त छ ।
छनोट अन्तर्गत समूह ‘सी’ को शिर्षस्थानमा जर्मनीको २४ अंक छ भने दोस्रो स्थानमा रहेको नर्दन आयरल्यान्डको १९ अंक छ । ९ समूहमा विभाजित ५४ राष्ट्र मद्धे हरेक समूहका विजेताले स्वतः रुस विश्वकपमा स्थान पाउनेछन् भने दोस्रो स्थानका उत्कृष्ट ८ टोलीले अर्को ४ स्थानका लागि ‘होम एन्ड अवे’ प्ले अफमा भिड्नेछन् । आजको खेलमा बराबरी गरेमा जर्मनी अन्तिम खेल अघि नै समूह विजेता हुनेछ ।
त्यस्तै घरेलु टोलीको समूहमा दोस्रो स्थान पक्का भएपनि आफ्नो आँकडा सुधार्ने प्रयासमा जर्मनीलाई कडा प्रतिस्पर्धा दिनेछ । अघिल्ला केहि खेल चोटका कारण नखेलेका वेस्ट ब्रोमका डिफेन्डर ग्यारेथ माकएली खेलमा फर्किदा आयरल्यान्डको रक्षापङ्क्ति थप बलियो हुनेछ ।
जर्मन भने आर्सनलका मिदफिल्डर ओजिल र युभेन्टसका सामी खेडिरा विना मैदानमा उत्रने छ । त्यस्तै उत्कृष्ट लयमा रहेका यूवा स्ट्राइकर टिमो वेर्नर पनि चोटका कारण उपलब्ध छैनन् ।
