बार्सिलोना (एजेन्सी) – स्पेनका भेट्रान मिडफिल्डर तथा बार्सिलोनाका कप्तान आन्द्रेस इनिष्टाले क्लबसँग नयाँ सम्झौतामा नवीकरण गरेका छन् । ३३ वर्षीय भेट्रान मिडफिल्डर इनिष्टाले आफ्नो खेल जीवनभरको लागि क्लबसँग शुक्रबार नयाँ सम्झौतामा हस्ताक्षर गरेका हुन् ।
इनिष्टाको क्लबसँगको सम्झौता यस सिजनको समाप्तिसम्म मात्र रहेको थियो । ‘इनिष्टाले क्लबसँग शुक्रबार आजीवन क्लबमा रहने गरी सम्झौतामा नवीकरण गरेका छन्, अब उनले आफ्नो खेलजीवनको अन्त्य बार्सिलोनाबाटै गर्नेछन् ।’ क्लबको विज्ञप्तिमा लेखिएको छ । ‘यो मेरो लागि एकदमै विशेष दिन बनेको छ किनभने म घरमै रहने पक्का भएको छु ।’
नवीकरण पछि ३३ वर्षीय इनिष्टाले भने, ‘हरेक महत्वपूर्ण कार्यहरु मैले यहीबाट पाइरहेको छु ।’ बार्सिलोनाका लागि एक खेलाडीले खेलजीवनभर क्लबमै रहने गरी सम्झौता गरेको यो नै पहिलोपटक रहेको प्रशिक्षक जोसेफ मारिया बार्टाेमेउले थपेका छन् । इनिष्टा २१ वर्ष अघि अर्थात १२ वर्षको उमेरमा क्लबमा अनुबन्ध भएका थिए । बार्सिलोना क्लबको इतिहासमा इनिष्टालाई आइकोनिक खेलाडीको रुपमा लेखिएको छ । इनिष्टाले क्लबमा रहँदा टिम सहयात्री लियोनेल मेस्सीसँगै ३० उपाधि जितिसकेका छन् ।
स्पेन तथा बार्सिलोनाका अर्का मिडफिल्डर जाभीले सन् २०१५ मा बार्सिलोना छाडेपछि इनिष्टाले कप्तानको जिम्मेवारी पाएका थिए । त्यसयता इनिष्टाले बार्सिलोनाको कप्तानी सम्हालिरहेका छन् । जारी सिजनको स्पेनिस ला लिगामा बार्सिलोना शतप्रतिशत जितको नतिजा निकाल्दै ७ खेलबाट २१ अंक जोड्दै लिगको शीर्ष स्थानमा रहेका छन् ।
