काठमाडौं (हाम्रो खेलकुद) – राष्ट्रिय फुटबल टोलीका गोलकिपर किरण चेम्जोङको माल्दिभियन टोली टिसी स्पोर्टसले धिवेही प्रिमियर लिग (डिपिएल) मा गए राती महत्वपूर्ण खेल जितेको छ ।
त्रिपक्षिय उपाधि दौडमा रहेको डिपिएलमा टिसी स्पोर्टस्ले अर्को दाबेदारमध्येको एक माजियालाई २–१ ले हराएको किरणले हाम्रो खेलकुद डटकमलाई जानकारी दिएका छन् । त्यो जितसँगै टिसी स्पोर्टस् डिपिएल अंक तालिकाको दोस्रो स्थानमा उक्लेको छ ।
हिजै शीर्ष स्थानको न्यू रेडियन्ट एफसीले क्लब ग्रिन स्ट्रिर्टसलाई ३–० ले हराएको छ । लिगमा ५ खेल बाँकी रहँदा न्यू रेडियन्ट र टिसी स्पोर्टसबीच २ अंकको फरक रहेको छ । न्यू रेडियन्टको २४ र टिसी स्पोर्टस्को २२ अंक पुगेको छ । माजियाको १९ र चौथो स्थानको क्लब ग्रिनको १२ अंक छ । डिपिएलमा ८ टोली छन् ।
तिहारको भाई टिकाको जित किरणले आफ्नी दिदी शान्तिलाई समपर्ण गरेको बताएका छन् । लगातार दुई वर्ष दिदीसँग टिका लगाउन नपाउँदा दुःख त लागेको छ, किरणले भने,तर दुवै पटक दिदीलाई जितको खुसी दिन पाउँदा खुसी पनि लागेको छ । गत वर्ष देशका लागि एएफसी सोलिडारिटी कप जितको उपहार दिन पाएको थिए । यसपटक यहाँ महत्वपूर्ण खेल जित्यौं ।
खेल अघि फोनमा दिदीले शुभकामना दिएको उनले सुनाए । आमा बुबाका हामी दुई सन्तान मात्र हौं । टिकाको दिन भएकोले मैले दिदीलाई फोन गरेको थिए , उनले थपे, दिदीले सफलताको शुमकामना दिनु भएको थियो । खेल जित्यौं पनि यो भन्दा ठूलो उपहार दिदीलाई मैले दिन सक्ने अहिलेलाई केही थिएन ।
