कठमाडौं (हाम्रो खेलकुद) – एएफसी यू–१९ च्याम्पियनसिप फुटबलमा नेपालले लगातार दोस्रो हार बेहोरेको छ । कीर्गिस्तानको बिस्केकस्थित डोलेन ओमुरजाकोभ रंगशालामा आज १० खेलाडीमा सिमित हुँदै खेलको अन्त्य गरेको नेपाल बहराइनसँग ४–० ले पराजित भएको थियो ।

पहिलो खेलमा नेपाल कीर्गिस्तानसँग पराजित भएको थियो । यो हारसँगै छनोटको कठिन मानिएको समूह ‘ए’ मा रहेको नेपालको अघिल्लो चरण पुग्ने सम्भाना निकै कमजोर भएको छ । नेपालले तुलनात्मक रुपमा बलियो मानिएको बहराइनसँग राम्रो खेल्न सकेन । बहराइनको जितमा अली हसनले २ इब्राहिम मुबारक र हुसेनले समान १–१ गोल गरे ।

बहराइनले खेलको २० औं मिनेटमा अलीको गोलबाट अग्रता बनाएको थियो । त्यस्तै ६९ औं मिनेटमा अलीले व्यक्तिगत दोस्रो गोल गर्दै बहराइनलाई २–० को अग्रता दिलाए । ८७ औं मिनेटमा मुबारकले र इन्जुरी समयमा हुसेनले गोल गर्दै बहराइनलाई सहज जित दिलाए । गर्दै बहराइनलाई ४–० को जित फराकिलो जित दिलाए । अन्तिम समयमा नेपाल १० खेलाडीमा समेटिएको थियो ।

दिनेश हेन्जनले रातो कार्ड पाएपछि नेपालको एक खेलाडी कम भएको थियो । अब कात्तिक १८ मा युएई र कात्तिक २२ मा ओमानसँग अन्तिम खेल खेल्नेछ । छनोटमा समूहको शीर्ष स्थानमा रहने टोली फाइनल चरणको लागि छानिनेछ । त्यस्तै दोस्रो हुने मध्ये उत्कृष्ट ५ टिम र आयोजक पनि फाइनल चरणका लागि छनोट हुनेछन् । फाइनल चरणमा पुग्ने टोलीले सन् २०१८ मा आयोजना हुने एएफसी यू–१९ च्याम्पियनसिपमा भाग लिनेछन् ।