लन्डन (एजेन्सी) – गए राति प्रिमियर लिगमा शीर्ष स्थानमा रहेको म्यानचेस्टर सिटी बर्नलीसँग १-१ को बराबरीमा रोकिएको छ ।
म्यानचेस्टर सिटीका लागि डिफेन्डर ड्यानिलोले खेलको २२ औं मिनेटमा सुन्दर गोल गर्दै टोलीलाई अग्रता दिलाएका थिए तर बर्नलीका जोहान गुडमुनसनले खेलको ८२ औं मिनेटमा घरेलु टोलीको एक अंक सुनिश्चित गरेका थिए ।
त्यस्तै म्यानचेस्टर युनाइटेडले हडर्सफिल्डलाई २-० ले हराउन सफल भयो । युनाइटेडका लागि पहिलो गोल स्ट्राइकर रोमेलु लुकाकुले गरेका थिए भने म्यानचेस्टर युनाइटेडका लागि दोस्रो खेल खेल्दै गरेका एलेक्सिस सान्चेजले पहिलो गोल गर्दै टोलीको जित सुनिश्चित गरे ।
गए राति नै खेलिएको अन्य खेलमा आर्सनलले एभर्टनलाई ५-१ ले हराउन सफल रह्यो । आर्सनलका लागि मिडफिल्डर आरोन राम्जीले ह्याट्रिक गरेका थिए । त्यस्तै नव खेलाडि पियर-एम्रिक अबामेयाङले आफ्नो डेब्यु खेलमै गोल गरे । आर्सनलका लागि अर्का नयाँ खेलाडि हेनरिक मिखितार्यनले ३ असिस्ट पनि गरेका थिए ।
यस नतिजासँगै सिटी पहिलो, युनाइटेड दोस्रो र आर्सनल छैटौं स्थानमा यथावत् नै छन् । युनाइटेडले सिटीसँगको अन्तर १३ अंकमा छोट्याएको छ ।
