पेरिस (एजेन्सी)– रियल म्याड्रिडका सुपर स्टार क्रिस्टियानो रोनाल्डोको यो सिजन उत्कृष्ट हुन सकेको छैन । तर, पेरिस सेन्ट जर्मेन (पिएजसी) का स्टार केलियन बाप्पे रोनाल्डाको फर्म पतन भइसकेको मान्न तयार छैनन् ।
ला लिगामा यो सिजन रोनाल्डोले उच्च प्रदर्शन गर्न सकेका छैनन् । उनले लिगका १७ खेलमा ८ गोल मात्र गरेका छन् । तर, च्याम्पियन्स लिगमा भने उनको प्रदर्शन सन्तोषजनक रहँदै आएको छ । पोर्चुगिज स्टारले यो सिजन च्याम्पियन्स लिगका ६ खेलमा ९ गोल गरिसकेका छन् । त्यसका आधारमा पनि च्याम्पियन्स लिगको खेलमा रोनाल्डोलाई हल्का लिन नहुने बाप्पेको बुझाई छ ।
‘रोनाल्डो अहिले पतन भएका छैनन् । यदि उनी पतन भएका मान्ने हो भने अरु धेरै खेलाडी पनि पतन भएको मान्नुपर्दछ,’ मंगलबार पिएजीको जितपछि उनले भने, ‘उनी महान खेलाडी हुन् । उनी हामीविरुद्ध खतरा बन्न सक्छन् । हामीले सबै खाले परिस्थितिका लागि तयार हुनु पर्दछ । उनी टोलीको बलियो आधार हुन् ।’
रियल ला लिगामा शीर्षस्थानको बार्सिलोना भन्दा १९ अंकले पछाडि रहेको छ । त्यस्तै टोली अर्को सिजन च्याम्पियन्स लिगको छनोटका लागि समेत संघर्ष गरिरहेको छ । पिएसजीसँगको खेल रियलका प्रशिक्षक जिनेदिन जिदानका लागि अन्तिम मौकाका रुपमा हेरिएको छ । रियल र पिएसजीबीच च्याम्पियन्स लिगको प्रि क्वार्टरफाइनलको पहिलो लेग सान्टियागो बेर्नाबेउमा फेब्रुअरी १५ मा हुनेछ ।
