लण्डन (एजेन्सी) – इङ्ग्लिस प्रिमियर लिगको साविक विजेता चेल्सीका स्टार खेलाडि एडेन हाजार्डले सिजनको अन्त्यपछि रियल म्याड्रिडसँग जोडिने सङ्केत दिएका छन् ।
हाजार्डले हालै अन्तर्वातामा आफू चेल्सीसँग खुशी रहेको तर फुटबलमा जे पनि हुन सक्ने भएकाले आफू रियल म्याड्रिड पुग्ने-नपुग्ने अहिले निश्चित नरहेको बताए । तर विभिन्न श्रोतले हाजार्डको यो उत्तरलाई उनी रियल जाने सङ्केतका रुपमा हेरेका छन् ।
हाजार्डले यसअघि पनि रियल म्याड्रिडका प्रशिक्षक जिनेदिन जिदानको प्रशंसा गरेका थिए र उनीसँग काम गर्न इच्छुक रहेको बताएका थिए । जिदानले पनि हाजार्ड आफ्नो मनपर्ने खेलाडि रहेको बताएका थिए ।
अहिले चेल्सी प्रिमियर लिगमा निकै खराब लयमा रहेको छ । त्यस्तै रियल म्याड्रिडको पनि यस सिजन सोचेको जस्तो प्रदर्शन हुने सकेको छैन । यस सिजनको अन्त्यमा रियलले केहि ठूला नाम ल्याउनेमा पक्का छ । त्यसमा नेयमार पनि छन् र चेल्सीका हाजार्ड तथा टोटनह्यामका ह्यारी केनप्रति पनि रियलले चासो देखाएको छ ।
हाजार्डलाई रियल ल्याएर रियल म्याड्रिडका इस्कोलाई चेल्सी पठाउने हल्ला पनि बजारमा चलिरहँदा जिदानले इस्कोलाई आफूले लामो समयका लागि रियलमा देखेको बताएका थिए ।
हाजार्ड विश्व फुटबलमा एक स्थापित नाम हुन् र दुवै पक्ष्य एकअर्काप्रति आकर्षित पनि छन् । त्यसैले अर्को सिजनमा हाजार्डलाई रियल म्याड्रिडको जर्सीमा देखिनु कुनै आश्चर्य भने हुने छैन ।
