म्याड्रिड (एजेन्सी) – स्टार फरवार्ड क्रिस्टियानो रोनाल्डोको ह्याट्रिकमा रियल म्याड्रिडले रियल सोसिडाडलाई ५-२ ले पराजित गरेको छ ।
शनिबार ला लिगा अन्तर्गत भएको खेलमा रियलले लुकमस भाज्केजको पहिलो मिनेटको गोलमा अग्रता लिएको थियो । उनले रोनाल्डोकै पासमा गोल गरे । २७ अौं मिनेटमा मार्सेलोको पासमा गोल गर्दै अग्रता दोब्बर पारेका रोनाल्डोले ३७ र ८० अौं मिनेटमा पनि गोल गरे ।
रियलकालागि अर्को गोल टोनी क्रुसले गरेका थिए । सोसिडाडका लागि दोस्रो हाफमा जोन बाउटिस्टा र अासिएर इलारामेन्डीले गोल गरे । यो रियलको लिगमा १२ अौं जित हो ।
अन्य खेलमा एट्लेटिको म्याड्रिडले मालागाको मैदानमा १-० को जित रच्यो । एन्टोइन ग्रिज्मनले पहिलो मिनेटमा गरेको गोल निर्णायक सावित भयो । अलाभेसले भिल्लारियललाई २-१ ले पराजित गर्यो ।
रियल २२ खेलमा ४२ अंक लिएर तालिकाको तेस्रो स्थानमा उक्लिएको छ । दोस्रो स्थानमा रहेको एट्लेटिकोको ५२ अंक छ । बार्सिलोना ५८ अंकसहित शीर्ष स्थानमा छ ।
