म्याड्रिड (एजेन्सी)– क्रिस्टियानो रोनाल्डो फुटबल इतिहासकै उत्कृष्ट खेलाडी मध्ये एक हुन् । उनका नाममा थ्रुपै कीर्तिमान रहेका छन् । गए राती रियल बेटिसलाई रियल म्याड्रिडले ५–३ ले हराउँदा रोनाल्डोले अर्को एउटा कीर्तिमानसँग बराबरी गरेका छन् ।

३२ वर्षे पोर्चुगिज स्टारले टोलीका लागि गोल गर्दै रियलका लागि २ सय ६४ खेलमा गोल गरेका छन् । रियलका पूर्व कप्तान महान खेलाडी राउलको कीर्तिमानसँग रोनाल्डोले बराबरी गरेका हुन् । सन् २००९ मा म्यानचेस्टर युनाइटेडबाट रियल पुगेयता रोनाल्डो आफुलाई महान खेलाडीका रुपमा प्रमाणित गरिसकेका छन् ।

उनले अहिले सम्म क्लबका लागि सर्वाधिक ४ सय ३२ गोल गरिसकेका छन् । निकट भविष्यमै उनले ५ सय गोल गर्ने अनुमान गरिएको छ । ला लिगा र च्याम्पियन्स लिग विजेता रियलको यो सिजनको सुरुआत राम्रो हुन सकेन । यद्दपी बलोन डी’ओर विजेता रोनाल्डोले पनि विस्तारै आफुलाई उत्कृष्ट लयमा फर्काएने कोशिस गरिरहेका छन् ।

उनले यो सिजन सबै प्रतियोगितामा गरि क्लबका लागि २५ गोल गरिसकेका छन् । टोली अहिले ला लागिको चौथो स्थानमा छ र शीर्षस्थानको बार्सिलोनाभन्दा १७ अंकले पछाडी छ । ला लिगामा सन्तोषजनक प्रदर्शन हुन नसकेपछि रियलले च्याम्पियन्स लिगमा उच्च प्रदर्शन गरेको छ । च्याम्पियन्स लिगको अन्तिम १६ को पहिलो लेगमा रियलले पेरिस सेन्ट जर्मेनलाई ३–१ ले हराएको थियो ।