पेरिस (एजेन्सी)– डिडिएर ड्रोग्बाका छोरा आइज्याकले पनि बाबुकै पदचाप पछ्याएका छन् । महान खेलाडीका छोराले लिग वान क्लब गुइनगाम्पसँग सम्झौता गरेका छन् । चेल्सीको एकेडेमीमा पनि समय बिताएका १७ वर्षे युवा खेलाडीलाई सोमबार फ्रान्सेली क्लबले सार्वजनिक गरेको थियो । १६ वर्ष अघि उनका पिता ले मान्सबाट ८० हजार पाउन्डमा सोही क्लबमा आबद्ध भएका थिए ।
डिडिएर ड्रोग्बाका छोरा इसाक (बायाँ) ।
३९ वर्षको उमेरमा एमएलएस क्लब फोनिक्स राइजिङबाट खेलिरहेका ड्रोग्बाले छोराको सफलतामा खुसी लुकाउन सकेनन् र इन्स्टाग्राममा नयाँ क्लबको जर्सीसहित छोराको फोटो पोस्ट गरेका छन् ।’ यो भन्दा बढी गर्व गर्ने ठाँउ छैन,’ ड्रोग्बाले लेखेका छन् ।
उनका चेल्सीका पूर्व सहकर्मी फ्रान्क लामपार्डले तत्काल बधाई दिदै भनेका छन्, ‘म आइज्याकलाई सम्झन्छु । ऊ एउटा सानो केटोबाट अब ठूलो मान्छे भएको छ ।’ अर्का चेल्सीका पूर्व सहकर्मी जोन टरीले भनेका छन्, ‘उनी कति ठूलो भइसकेछन्, विश्वास गर्नै गाह्रो । बधाई ।’
