लन्डन (एजेन्सी)– चेल्सीका फरवार्ड पेड्रोले लियोन मेस्सीको खुलेर प्रशंसा गर्दै विश्वकै उत्कृष्ट खेलाडी भएको बताएका छन् । तर, सँगै उनले मेस्सी जित्नै नसक्ने खेलाडी नभएको धारणा पनि राखेका छन् । बार्सिलोनाको एकेडेमीका उत्पादन पेड्रोले आठ बर्ष त्यहि क्लबमा बिताएका थिए । स्पेनमा हुँदा मेस्सीसँगै उनले टोलीलाई थुप्रै उपाधि पनि दिलाएका थिए ।
३० वर्षे पेड्रोको टोलीले मंगलबार पूर्व क्लब बार्सिलोनाको सामना गर्नुअघि उनले पूर्व सहकर्मीको प्रशंसा गरेका हुन् । चेल्सी मेस्सीलाई रोक्ने सक्नेमा पेड्रो आशावादी पनि छन् । अर्जेन्टिनी सुपरस्टार मेस्सीले अहिले सम्म चेल्सीसँगको ८ भेटमा गोल गर्न भने सकेका छैनन् ।
‘मेस्सी विश्वकै उत्कृष्ट खेलाडी हुन् । तर, जित्नै नसकिने होइनन् । निश्चय नै यो बार्सिलोना टोली हो र त्यो टोलीमा मेस्सी छन्,’ उनले भने, ‘उनलाई रोक्न निकै कठिन छ, किनकी उनी छिट्टो छन्, चलाख छन् । तर असम्भव केही छैन ।’
पेड्रोले मेस्सीलाई अर्कै स्तरको खेलाडीको संज्ञा दिए । ‘उनले जे गर्न सक्छन् त्यो अरुले सक्दैन । यहि कारणले उनलाई विशेष बनाएको छ,’ उनले भने, ‘मेरा लागि पनि विशेष छन् । मैले भविष्यमा मेरो छोरालाई भन्नुपर्दा इतिहासमा उनी सबैभन्दा राम्रो खेलाडी भन्ने छु ।’
चेल्सी र बार्सिलोनाबीचको प्रतिस्पर्धा सधै उत्साहजनक हुँदै आएको छ । त्यस्तै विवादस्पद पनि । बार्सिलोना यति बेला फर्ममा छ तर घरेलु मैदानमा चेल्सीले पनि यसै हार मान्ने छैन ।
