म्याड्रिड (एजेन्सी)– रियल म्याड्रिडका पोर्चुगिज सुपर स्टार क्रिस्टियानो रोनाल्डो पोर्चुगल फुटबल संघको वर्षको उत्कृष्ट खेलाडी २०१७ को मनोनयनमा परेका छन् ।
रोनाल्डोसँगै म्यानचेस्टर सिटीका बेर्नाडो सिल्भा र स्पोर्टिङ लिस्बोनका रुइ पेट्रिसियो मनोनयमा परेका छन् । रियलका लागि रोनाल्डोको पछिल्लो सिजन अविश्वसनिय रह्यो । च्याम्पियन्स लिग र ला लिगासहित रोनाल्डो सम्मिलित रियलले ५ वटा उपाधि जितेको थियो ।
रोनाल्डोले पाँचौं पटक बालोन डी ओर, फिफा र युईएफएको वर्षको उत्कृष्ट खेलाडी अवार्ड जितेका थिए । पोर्चुगलको वर्षको उत्कृष्ट खेलाडीको चयन पोर्चुगल फुटबल संघ, राष्ट्रिय फुटबल प्रशिक्षक संघ र व्यवसायिक फुटबल खेलाडी युनियनले संयुक्त रुपमा गर्छन् ।
त्यसमा मार्च १९ मा अवार्ड दिने अगाडिसम्म अनलाइन भोटिङको प्रक्रिया पनि अपनाइनेछ । यसपटक पनि रोनाल्डोलाई अवार्डको मुख्य दाबेदार मानिन्छ । यसअघि सन् २०१५/१६ र २०१६/१७ मा पनि उक्त अवार्ड रोनाल्डोले नै जितेका थिए ।
