दिपक न्यौपाने
बुटवल – बुटवलमा जारी तिलोत्तमा गोल्डकप नकआउट फुटवल प्रतियोगितामा आयोजक लाली रुपन्देही–११ सेमिफाइनलमा प्रवेश गरेको छ । देविनगरस्थित एन्फा एकेडेमीमा भएको रोमाञ्चक क्वाटरफाइनलमा नवलपरासी –११ लाई ३–१ ले स्तब्ध पार्दै रुपन्देहीले सेमिफाइनलमा स्थान पक्का गरेको हो ।
रुपन्देहीका अशोक थापाले खेलको २३ औं मिनेटमा नवलपरासीका डिफेन्सलाई छक्याउदै आर्कषक गोल गरेका थिए । खेलको ३० औं मिनेटमा गौरव बुढाथोकीले डिबक्स बाहिरबाट गरेको प्रहार बाहिरिएको थियो ।
खेलमा १–० ले पछि परेको नवलपरासी दोस्रो हाफमा फर्कने प्रयास गर्यो । ५७ औं मिनेटमा रुपन्देहीका अशोक थापाको क्रसलाई अमर डंगोलले डिबक्सबाट गरेको फितलो प्रहार नवलपरासीका गोलकिपर सन्देश गुरुङले बचाएका थिए ।
खेलको ६५ औं मिनेटमा नवलपरासीका विदेशी खेलाडी कोलीले डिबक्स बाहिरबाट हानेको फ्रिकिकलाई सुन्दर गोलमा परिणत गर्दै खेललाई बराबरीमा ल्याउन सफल भएका थिए । आशिष गुरुङले बेलमेक्सलाई लडाएपछि डिबक्स बाहिर पाएको फ्रिकिकलाई कोलीले गोल गर्दा रुपन्देहीका समर्थकहरु निराश देखिन्थे । तर रुपन्देही खेलमा पुनः फकर्दै दुई गोल गर्न सफल भयो ।
खेलको ८३ औं मिनेटमा रुपन्देहीका स्ट्राईकर निशान लिम्बुलाई युवराज चापागाईले डिबक्सभित्र लडाएपछि पाएको पेनाल्टीलाई निशानले नै सदुपयोग गर्दै टिमलाई पुनः २–१ को अग्रतामा ल्याए । खेलको ईन्जुरी समयमा लाली रुपन्देहीका अशोक थापाले नवलपरासीका ३ जना डिफेडरलाई छक्याउदै गोल गर्दा घरेलु दर्शक जितको स्वाद चाख्दै प्यारफिटबाट बाहिरीएका देखिन्थे ।
खेलमा विजेता रुपन्देहीका गौरव बुढाथोकी ‘म्यान अफ दी म्याच’ घोषित हुदै नगद ११ हजार नगदबाट पुरस्कृत भएका थिए । आइतबारको खेल दुई विभागीय टिम सशस्त्र प्रहरी बलको एपीएफ क्लबले नेपाल पुलिस क्लबसंग सामना गर्ने संघका महासचिव लोक पुनले हाम्रो खेलकुद डटकमलाई बताए ।
