माल्दिभ्समा सावित्रासँगै अनिताको पनि गोल

काठमाडौं (हाम्रो खेलकुद) – नेपाली महिला फुटबल टोलीकी स्ट्राइकर सावित्रा भण्डारी र मिडफिल्डर अनिता बस्नेत सम्मिलित पुलिस क्लबले माल्दिभ्समा १८/३० महिला फुटसल फिस्टामा लगातार दोस्रो जित हासिल गरेको छ । पुलिस क्लबले शनिबार भएको खेलमा इकोनोमिक डेभल्पमेन्टलाई १७–० को फराकिलो अन्तरले हराएको छ ।

जितमा नेपाली खेलाडीको भूमिका महत्वपूर्ण रह्यो । उम्कोलाई ३–० ले हराएको पहिलो खेलमा १ गोल गरेकी सावित्राले इकोनोमिकविरुद्ध एक्लै ८ गोल गरेकी छन् । सावित्राले हाम्रो खेलकुदलाई दिएको जानकारी अनुसार खेलमा अनिताले पुलिसका लागि २ गोल गरेकी हुन् । सावित्रा खेलको क्विन अफ दी म्याच समेत रहिन् । माल्दिभ्समा सावित्रा र अनिताको यो दोस्रो सिजन हो । गत सिजन उनीहरुले माल्दिभ्स एयरपोर्ट कम्पनीबाट खेलेका थिए ।

दक्षिण एसियाकी उत्कृष्ट स्ट्राइकर मध्येकी एक सावित्रा गत वर्ष सोही प्रतियोगितामा उत्कृष्ट खेलाडी घोषित भएकी थिइन् । सावित्राले गत वर्ष प्रतियोगितामा ४ खेलमा १३ गोल गरेकी थिइन् । यो सिजन २ खेलमा सावित्राको गोल संख्या ९ पुगेको छ । यो सिजन एक महिनाका लागि सावित्रा र अनिता २ हजार अमेरिकी डलरमा पुलिसमा आबद्ध भएका हुन् ।