बंगबंधु गोल्ड कप २०१६को फाइनल खेलमा भोलि नेपाल र बहराइन यु-२३ भिड्दै छन्|

ढाकास्थित बंगबंधु राष्ट्रिय रंगशालामा खेलिने खेल नेपाली समयअनुसार साँझ ४:४५मा सुरु हुनेछ| खेलको प्रत्यक्ष प्रसारण हाम्रो खेलकुद डट कमले पनि गर्नेछ| सेमिफाइनलमा माल्दिभ्सलाई ४-१को फराकिलो जित हात परेको नेपालले घरेलु टोलि बंगलादेशलाई १-०ले हराएको बहराइन यु-२३को सामना गर्नेछ|

समूह चरणमा एक मात्र गोल गरेको नेपालले माल्दिभ्स विरूद्धको खेलमा चार गोल हानेको थियो| नवयुग श्रेष्ठले व्यक्तिगत ह्याट्रिक र विशाल राइले अन्तराष्ट्रिय फुटबलमा गोलको खाता खोलेका थिए| जारी प्रतियोगितामा बहराइन र नेपाल दुबैले कुनै खेल हारेका छैनन्| दुवै टोलि समूह उपविजेता हुदैं सेमिफाइनल पुगेका थिए भने दुवैले हालसम्म दुइ जित र दुइ बराबरी खेलेका छन्|

सत्र वर्षपछि कुनैपनि प्रतियोगिताको फाइनल पुगेको नेपालले सिनियर टोलीमा रहेको उपाधिको खंडेरी तोड्ने दाउमा छ| पछिल्लो पटक नेपालले उपाधि जित्दा खेलाडीका रुपमा रहेका उपेन्द्र मान सिंह र बालगोपाल महर्जन अहिले प्रशिक्षकका रुपमा टोलीमा रहेका छन्|