काठमाडौं, माघ १७ । ग्लोबल आईएमई बैंक लिमिटेड र आईएमई लिमिटेडद्वारा बंगबन्धु गोल्डकप विजयी खेलाडीहरु सम्मानित भएका छन् ।
ग्लोबल आईएमई बैंक लिमिटेड र आईएमई लिमिटेडले एन्फा कम्प्लेक्स सातदोबाटोमा आइतबार एक कार्यक्रमको आयोजना गर्दै टोलीका सबै २७ सदस्य तथा पदाधिकारीहरुलाई जनही २५–२५ हजारका दरले एकमुष्ट रुपमा ६ लाख ७५ हजारले सम्मान गरेको हो ।
सम्मान कार्यक्रममा बोल्दै प्रमुख अतिथि एवम् एन्फाका कार्यवहाक अध्यक्ष नरेन्द्र श्रेष्ठले बंगबन्धु गोल्डकप विजयी खेलाडी तथा पदाधिकारीहरुलाई सम्मानित गरेकोमा आईएमईलाई संघको तर्फबाट धन्यवाद दिदै नेपाली खेलाडीहरु सम्मानको हकदार भएको बताए । ‘यस्ता खालका सम्मानले खेलाडीमा थप हौसला बढ्नेछ ।’ अध्यक्ष श्रेष्ठले भने, ‘भारतमा हुने आसन्न सागमा पनि यस्तै खालको जुझारु प्रदर्शन गर्दै तीन करोड नेपाली माझ अझै खुशी ल्याउन कोसिस गर ।’ उनले हरेक खेललाई नयाँ खेलको रुपमा सुरुआतको रुपमा लिएर साग जितेर आउन शुभकामना पनि दिए ।
यस्तै ग्लोबल आइएमईका कार्यकारी अध्यक्ष चन्द्र प्रसाद ढकालले आइएमईको यो सानो सम्मान भएको बताउदै आगमी दिनहरुमा खेलकुदका कुनै पनि गतिविधिमा सँगै हातेमालो गर्दै अघि जाने बताए । उनले आफ्नो बाल्यकाल स्मरण गर्दै पछिल्लो समयमा खलेमा रुचि बढ्दै गएको उल्लेख गर्दै खेल क्षेत्रमा आफु र र आँफु सम्बद्व कम्पनीले सहयोग गर्दै जाने बताए । साथै सोही अबसरमा ग्लोवल आईएमई बैकले कुनै पनि राष्ट्रिय टिमका खेलाडीलाई शुन्य मौज्दातमा खाता खोल्ने सुविधा र निशुल्क एटिएम कार्ड उपलब्भ गराउने घोषणा गरेको छ ।
बंगबन्धु गोल्डकप विजयी गराउने टिमका मुख्य प्रशिक्षक बालगोपाल महर्जनले यसरी सम्मानित गर्दै जादा थप हौसला मिलेको बताए । ‘यो म एक्लैले गर्दा पाएको सफलता हैन । यो सफलतमा मलाई साथ दिने सबैको हात छ ।’ प्रशिक्षक महर्जनले भने, ‘सबै टिमको स्प्रिटले नै सफलता मिलेको हो । यस्तो किसिमको सम्मानले थप उत्प्रेरित गर्दछ ।’ यस्तै टिमका कप्तान विराज महर्जनले फुटबल फ्यानका समर्थकको साथ र माया लिएर सागमा अझै यो भन्दा राम्रो गरेर देखाउने बताए ।
खेलाडी तथा पदाधिकारीहरुलाई अखिल नेपाल फुटबल संघ(एन्फा)का कार्यवहाक अध्यक्ष नरेन्द्र श्रेष्ठ, ग्लोबल आईएमईका कार्यकारी अध्यक्ष चन्द्र प्रसाद ढकाल, आईएमई लिमिटेडका कार्यकारी निर्देशक हेमराज ढकाल, एन्फाका सिइओ इन्द्रमान तुलाधर लगायतले सम्मानित गरेका थिए ।
