मस्को (एजेन्सी) – रुसमा जारी फिफा विश्वकप फुटबल प्रतियोगिताको प्रि–क्वार्टरफाइनलको बहुप्रतिक्षित खेलमा आज राति इंग्ल्यान्ड र कोलम्बियाबीचको खेल हुनेछ । यसपछि रसिया विश्वकपको क्वार्टरफाइनल समिकरण पुरा हुनेछ । इंग्ल्यान्ड र कोलम्बियाबीचको बहुप्रतिक्षित प्रि–क्वार्टरफाइनल खेल मंगलबार राति ११ः४५ बजे स्पार्कटक स्टेडियम मस्कोमा हुनेछ ।

कप्तान ह्यारी केन प्रेरित इंग्ल्यान्डले यो आफैले चाहेर बनेको समिकरण हो । बराबरीले पनि समूह विजेता बनेर अघि बढ्न सक्ने इंग्ल्यान्डले बेल्जियमविरुद्धको खेलमा दोस्रो रोजाईको टोली उतार्दै कम्तीमा पनि क्वार्टरफाइनलमा ब्राजिलसँगको भेटलाई टारेको थियो । युवा खेलाडीले भरिएको उत्साहित इंग्ल्यान्डले कोलम्बियालाई सहजै पराजित गर्ने योजना बनाएको छ ।

समूह चरणमा विपक्षी टिमविरुद्ध धेरै गोल गर्ने टिममा इंग्ल्यान्ड पनि रहेको छ । इंग्ल्यान्डले समूह चरणको तीन खेलमा ८ गोल गर्दै ३ गोल मात्र खाएको थियो । इंग्ल्यान्डले पहिलो खेलमा ट्युनिसियामाथि २–१ को तथा दोस्रो खेलमा पानामाविरुद्ध ६–२ को जित निकाल्दा समूअ चरणको अन्तिम खेलमा बेल्जियमसँग १–० ले पराजित भएको थियो । त्यसैले कोलम्वियाविरुद्ध इंग्ल्यान्ड पल्लाभारी हुने अनुमान गरिएको छ ।

समूह चरणका शुरुवाती दुई खेल जितेर उत्साहित बनेको इंग्ल्यान्डसँग कप्तान ह्यारी केन, जेसे लिङ्गार्ड, रहिम स्ट्रलिङ र चोटबाट पुनरागमन गर्दै गरेको डेल अली जस्ता युवा प्रतिभावान खेलाडीहरुको साथ छ । उच्च फर्ममा रहेका केन इंग्ल्यान्डको मुख्य हतियार बन्नेछन ।

यता इंग्ल्यान्डलाई अहिलेसम्म पराजित गर्न नसकेको कोलम्बिया बदला लिने योजनाका साथ मैदान उत्रनेछ । अहिलेसम्म यी दुई टोली तीनपटक आमनेसामने हुदा दुई खेलमा इंग्लयान्ड विजयी भएको छ भने एक खेल बराबरीमा सकिएको छ । त्यसैले कोलम्बिया इंग्ल्यान्डविरुद्धको हारको जिङ्कसलाई जसरी पनि तोड्ने कोलम्बियाको एकमात्रै विकल्प बनाएको छ ।

यस्तोमा कोलम्बियालाई कप्तान राडामेल फल्काओ, हामेस रोड्रिग्वेज, यारी मिना र जुवान कोर्डाडोको उच्च प्रदर्शन जेसे पेकरम्यानको हतियार बन्नेछ । समूह चरणको एसियाली राष्ट्र जापानसँग २–१ ले स्तब्ध भएपनि कोलम्बियाले सम्हालिएको प्रदर्शन गर्दै समूह विजेताको रुपमै अन्तिम १६ मा स्थान बनाउन सफल भएको हो ।

पछिल्लोपटक यी दुई टिमले २००५ मा मैत्रीपूर्ण खेल खेलेको थियो । जसमा इंग्ल्यान्ड ३–२ ले विजयी भएको थियो । समुह चरणमा आधार मान्ने हो भने यी दुई टिमबीचको खेल निकै प्रतिस्पर्धात्मक र रोमाञ्चक हुने अनुमान गरिएको छ । तर, जेम्स रोड्रिग्वेजको चोटले पनि कोलम्बियाको खेलमा प्रभाव पार्न सक्नेछ ।