मस्को (एजेन्सी)– बेल्जियमका थोमस म्युनियरले ब्राजिलविरुद्धको विश्वकप क्वार्टरफाइनलमा पेरिस सेन्ट जर्मेन (पिएसजी) का सहकर्मी नेयमारबाट आफुले बढी चुनौतिको अपेक्षा गरेको बताएका छन् । तर, बेल्जियमको पोष्टमा खेलको अन्त्यतिर एक गोल फर्काउन पनि ब्राजिलले निकै संघर्ष गर्नुपरेको थियो ।

जबकी बेल्जियमले पहिलो हाफमै २–० को अग्रता बनाएको थियो । नेयमारको प्रदर्शन समान्यभन्दा माथि रहन सकेन । ब्राजिलको एउटा गोलको लागि पनि फिलिपे काउटिन्होको भूमिका महत्वपूर्ण रह्यो । उनको पासमा रेनाटो अगुस्टोले गोल गरेका थिए ।  फेर्नाडिन्होको आत्मघाती गोलबाट बेल्जियमले खेलमा अग्रता बनाएको थियो भने अर्को गोल केभिन डी ब्रुयनेले गरेका थिए । खेल बेल्जियमले २–१ जितेको थियो ।

म्युनियरले नेयमारलाई रोक्न कठिन नभएको बताएका छन् । ‘मले त्यति मात्र अपेक्षा गरेको थिइन । त्यो भन्दा बढी कठिन होला भन्ने अपेक्षा थियो, उनले भने,‘ हामी खास गरि काउटिन्हो र मार्सेलोमा केन्द्रित रह्यौं । हामीले त्यसमा सफल पनि भयौं । मलाई लाग्छ रक्षात्मक हिसाबले हामी सबै धन्यवादका पात्र रह्यौं ।’

म्युनियर आफ्नै आक्रमणमा भने सन्तुष्ट हुन सकेनन् । ‘ म अगाडि जाँदा बढी दिक्दार भए । मैले एउटा पनि बल छुन सकिन,’ उनले थपे,‘ मैले टोलीका लागि सक्दो गर्ने प्रयास गरे । खेल जित्न सफल भयौं , त्यसमा खुसी छौं ।’

बेल्जियमले अब सेमिफाइनलमा फ्रान्सको सामना गर्नेछ । अब ब्राजिलसँगको खेलमा भन्दा पनि टोलीले बढी चुनौतिको सामना गर्नुपर्ने हुन सक्दछ । प्रिक्वार्टरमा फाइनलमा मुस्किलले ३–२ ले हराउँदै बेल्जियमले ब्राजिलसँगको भेट पक्का गरेको थियो ।