लक्ष्मी हुण्डाई मनाङ मस्र्याङ्दी क्लबले हेटौंडामा जारी कलर्स अन्तर्राष्ट्रिय आमन्त्रण गोल्डकप फुटबल प्रतियोगितामा बिहिबार सहारा क्लब पोखरालाई पराजित गर्दै फाइनलमा प्रवेश गरेको छ ।
भूकम्पमा परी काठमाडौमा निधन भएका हेटौंडेली खेलपत्रकार सुमन भोम्जनको स्मृतिमा विहीबार आयोजना गरीएको सेमिफाइनलमा लक्ष्मी हुण्डाई मनाङ मस्र्याङ्दी क्लबले पोखराको सहारा क्लबलाई १–० गोलअन्तरले पराजित गर्दै फाइनलमा प्रवेश गरेको हो ।
प्रतियोगिताको उपाधीको लागी लक्ष्मी हुण्डाई मनाङ मस्र्याङ्दी क्लबले चिरपरिचत प्रतिद्वन्द्वी आर्मीसँग भिड्ने छ।
मनाङको जितमा अफ्रिकन खेलाडी अफिज ओलावालेले निर्णायक गोल गरे । उनले खेलको ७९ औं मिनेटमा गरेको गोलले मनाङलाई फाइनलसम्मको यात्रा तय गरायो । ओलावालेले यसअघिको खेलमा भारतको कञ्चनजंगाविरुद्ध ह्याट्रिक समेत गरेका थिए ।
खेलमा मनाङका मिडफिल्डर विश्वास श्रेष्ठ म्यान अफ दी म्याच घोषित भए । उनले कलर्स मोवाइल प्राप्त गरेका थिए ।
