काठमाडौं–
नेपालको राष्ट्रिय फुटबल टोलीले अर्को महिना मलेसियासँग मैत्रीपूर्ण फुटबल खेल्ने पक्का भएको छ ।
मलेसिया फुटबल संघको अनुरोधमा दुई देशबीच चैत १६ गते मलेसियाको क्वालालम्पुरमा मैत्रीपूर्ण खेल तय भएको अखिल नेपाल फुटबल संघ (एन्फा)ले मंगलबार जनाएको छ ।
नेपालले पछिल्लो एक महिनामा लगातार दुई उपाधि जितेको थियो । नेपाली राष्ट्रिय टोलीले माघमा बंगलादेशमा बंगबन्धु गोल्डकपको उपाधि जितेर फर्केको थियो ।
त्यस्तै त्यहि टोलीमा रहेका अधिकाशं खेलाडी सम्मिलित यू–२३ ले नौं दिन अघि भारतमा सम्पन्न १२ औं दक्षिण एसियाली खेलकुद (साग) मा स्वर्ण पदक जितेको थियो ।
सागमा नेपालले २३ बर्षपनि स्वर्ण पदक जितेको थियो । आउने दुई बर्ष नेपाली राष्ट्रिय टोलीले कुनै पनि अन्तर्राष्ट्रिय प्रतियोगिता खेल्नु नपर्ने भएकाले एन्फाले बढी भन्दा बढी मैत्रीपूर्ण खेलमा जोड दिने बताएको छ ।
