जुरिच (एजेन्सी)– फिफा वरियतामा नेपाल अघिल्लो महिनाको तुलनामा १ स्थान तल झर्दै १ सय ६१ औं स्थानमा पुगेको छ । फिफाले बिहीबार जारी गरेको पुरुष टोलीको अक्टुबरको वरियतामा नेपाल झरेको हो ।

फाइलः तस्वीर

पछिल्लो दुई महिनामा २ अलग अलग प्रतियोगिता खेलेको नेपालले ६ अन्तर्राष्ट्रिय खेल खेलेको थियो । त्यसमा २ जितेको र बाँकी खेल गुमाएको थियो ।
बंगलादेशको ढाकामा भएको साफ च्याम्पियनसिपको सेमिफाइनल सम्मको यात्रा तय गर्ने क्रममा नेपालले २ खेल जितेको थियो भने २ खेल गुमाएको थियो ।

सेप्टेम्बरमा भएको प्रतियोगितामा नेपाल पाकिस्तानसँग २–१ ले पराजित भएपनि समूह चरणका त्यसपछिका दुई खेलमा भुटानलाई ४–० र बंगलादेशलाई २–० ले हराएको थियो । सेमिफाइनलमा भने नेपाल माल्दिभ्ससँग ३–० ले पराजित भएको थियो ।

अक्टुबरको सुरुवातमा बंगलादेशमै भएको बंगबन्धु गोल्डकपमा भने नेपालले समूह चरणका दुवै खेल गुमाएको थियो । ताजकिस्तानसँग २–० ले पराजित नेपालले अर्को खेल प्यालिस्टानसँग १–० ले गुमाएको थियो ।

दक्षिण एसियाली राष्ट्रको वरियतामा भारत शीर्षस्थानमा छ । भारत फिफा वरियताको ९७ औं र माल्दिभ्स १ सय ५१ औं स्थानमा छ । दक्षिण एसियाका अन्य राष्ट्र नेपाल भन्दा पछि रहेका छन् । भुटान १ सय ८८ औं, बंगलादेश १ सय ९४ औं, पाकिस्तान १ सय ९९ औं र श्रीलंका २ सय एकौं स्थानमा छ ।

बेल्जियम फिफा वरियताको शीर्षस्थानमा रहँदा विश्व कप विजेता फ्रान्स दोस्रो, ब्राजिल तेस्रो, क्रोएसिया चौथो र इङ्ल्यान्ड पाँचौं स्थानमा छ । उरुग्वे, पोर्चुगल, स्विट्जरल्यान्ड, स्पेन र डेनमार्क क्रमश : छैटौं देखि दसौं स्थान सम्म छन् ।