धनगढी (हाम्रो खेलकुद) – विभागीय टोली नेपाल एपीएफ क्लबविरुद्ध एक गोलले पछाडी परेको स्थितिलाई उल्टाउँदै मेची नेत्रालय काक्करभीट्टा फुटबल ट्रेनिङ सेन्टर तेस्रो नेपाल आइस अन्तर्राष्ट्रिय सुदूरपश्चिम खप्तड गोल्डकपको सेमिफाइनलमा प्रवेश गरेको छ । शनिबार धनगढी रंगशालामा भएको पहिलो क्वाटरफाइनल खेलमा काक्करभिट्टा एपीएफविरुद्ध २-१ ले विजयी रहयो ।

खेलको नवौं मिनेटमा काक्करभिट्टाका कप्तान खामिर गिल्सनले पेनाल्टी क्षेत्रभित्रबाट गरेको प्रहारलाई राजु नगरकोटिले बचाए । लगत्तै त्यसै कर्नरको काउन्टरमा युवराज खड्काले एपीएफलाई अग्रता दिलाए । श्याम नेपालीले मैदानको मध्यभागबाट दिएको लामो पासलाई युवराजले पहिलो टचमा पेनाल्टी क्षेत्रबाहिरबाट नै गोलमा परिणत गरेका थिए । २६ अौं मिनेटमा विश्वास श्रेष्ठले पेनाल्टी क्षेत्र बाहिरबाट गरेको प्रहारलाई एपीएफका गोलरक्षक राजुले उत्कृष्ट डाइभ दिँदै बचाए ।

३५ अौं मिनेटमा विशाल राईको एक्रोब्याटिक प्रहार पोस्टभन्दा थोरै माथिबाट बाहिरिँदा काकरभिट्टा बराबरी गर्नबाट चुक्यो। ४१ अौं मिनेटमा विश्वास श्रेष्ठले बराबरी गोल फर्काए । विशाल राईले दिएको थ्रु पासमा विश्वासले गोलरक्षकलाई समेत छलाएर खाली पोस्टमा गोल गरेका थिए ।

पहिलो हाफकै इन्ज्युरी समयको पहिलो मिनेटमा काकरभिट्टाले अग्रता लिने सुवर्ण अवसर गुमायो । एपीएफका गोलरक्षक राजु नगरकोटिले विश्वास श्रेष्ठको फ्रिकिक बचाउने प्रयासमा फुत्काएपछि रिबाउन्डमा कप्तान खामिरले बललाई पोस्टको दिशा दिन सकेनन् ।

दोस्रो हाफको ६१ अौं मिनेटमा काकरभिट्टा अग्रता लिनबाट चुक्यो । विष्णु सुनारको फ्रिकिकमा विशाल राईले अफसाइड ट्र्याप बिट गरेपनि बललाई पोस्टको दिशा दिन सकेनन् । त्यसको दुई मिनेटमै विशालकै शक्तिशाली प्रहारलाई गोलरक्षक राजुले उत्कृष्ट बचाउ गरे ।
खेलको तीन मिनेट समय बाँकी रहँदा काक्करभीट्टाले अग्रता लियो । कर्नरमा आएको बल रिबाउन्ड भएपछि विकास राईले ६ यार्ड बक्स नजिकबाट गरेको प्रहार गोलमा परिणत भएको थियो ।

विजयी टोलीका प्रशिक्षक कर्ण थापामगरले पहिलो हाफमा प्रदर्शन सोचेअनुरुप नभएपनि बराबरी गोल निस्केपछि मनोबल उच्च रहेको बताए । ‘ खेलमा सुरुवात राम्रो हुन सकेन । बराबरी गोल गरेपछि मनोबल बढ्यो र दोस्रो हाफमा राम्रो प्रदर्शन गर्न सक्यौं,’ उनले थपे, ‘ सेमिफाइनलमा बलियो टोलीविरुद्ध खेल्नेछौं । दुवै टोली ए डिभिजनमा राष्ट्रिय टोलीको अनुभव बोकेका खेलाडी थिए । सक्दो मिहिनेत गरेर फाइनल पुग्ने प्रयास हुनेछ ।’

उत्कृष्ट प्रदर्शन गरेका काक्करभीट्टाका विश्वास श्रेष्ठ म्यान अफ द म्याच बन्दै १० हजार रुपैयाँ प्राप्त गरे यस जितसँगै काक्करभीट्टा खप्तड गोल्डकपको सेमिफाइनलमा प्रवेश गरेको छ । फाइनल प्रवेशका निम्ति टोलीले रुस्लान थ्री स्टार र च्यासलको खेलको विजेतासँग खेल्नेछ ।

मोफसलकै सर्वाधिक धनराशी पुरस्कार भएको यस प्रतियोगिताको विजेताले २१ लाख रुपैयाँ प्राप्त गर्नेछ । उपविजेताले १० लाख प्राप्त गर्दा विधागत उत्कृष्टतर्फ जनही १५ हजार रुपैयाँ प्रदान गरिनेछ ।