धनगढी (हाम्रो खेलकुद) – छिमेकी क्लब च्यासल युवा क्लबलाई १-० ले पराजित गर्दै रुस्लान थ्री स्टार तेस्रो नेपाल अाइस अन्तर्राष्ट्रिय सुदुरपश्चिम खप्तड गोल्डकपको सेमिफाइनलमा प्रवेश गरेको छ ‌। सोमबार धनगढी रंगशालामा थ्री स्टारको जितमा रुपेश केसीले निर्णायक गोल गरे ।

सातौं मिनेटमा सुनील बलको पासमा फोडे फोफानाको प्रहारलाई च्यासलका गोलरक्षक दिनेश थापामगरले पन्च गरे । त्यसकै नतिजामा प्राप्त कर्नरकमा सुनीलकै पासमा डुम्बियाको हेडर पोस्टभन्दा थोरै माथिबाट बाहिरियो । १९ अौं मिनेटमा च्यासलका हेमन्त थापामगरको फ्रिकिक क्रसबारमा लागेर फर्कंदा च्यासल अग्रता लिनबाट चुक्यो ।

२८ अौं मिनेटमा सुनील बलले पेनाल्टी क्षेत्रबाहिर बाट गरेको प्रहार पोस्टको भित्रि भागमा लाग्दै फर्कियो । ३९ अौं मिनेटमा थ्रीस्टारका अनन्त तामाङले झन्डै २५ यार्ड टाढाबाट गरेको प्रहारले गोलरक्षकलाई कुनै समस्या दिन सकेन । ४२ अौं मिनेटमा च्यासलका अर्मान्ड मोएनले वन भर्सेस वनको स्थितिमा पेनाल्टी क्षेत्रभित्रबाट गरेको प्रहारले पोस्टको दिशा लिन सकेन ।

दोस्रो हाफको ५८ अौं मिनेटमा च्यासलले अग्रता लिने सुवर्ण अवसर गुमायो । अर्मान्डको प्रहार अनन्तले ब्लक गरेपछि अाएको रिबाउन्डमा सन्तबहादुर गुरुङको प्रहारले पोस्टको दिशा लिन सकेन । ६२ अौं मिनेटमा सुनील बलले पेनाल्टी क्षेत्रको ठिक बाहिरबाट गरेको शक्तिशाली प्रहारलाई च्यासलका गोलरक्षक दिनेशले उत्कृष्ट बचाउ गर्दै खेल गोलरहित बराबरीमा कायम राखे ।

८१ अौं मिनेटमा रन्जन विष्टको उत्कृष्ट भली प्रहार क्रसबारमा लागेर फर्कियो । उनले झन्डै २५ यार्ड टाढाबाट बललाई छातीले नियन्त्रण गर्दै प्रहार गरेको भलीमा गोलरक्षक बिट भएपनि क्रसबार बाधक बन्यो । खेल सकिन तीन मिनेट समय बाँकी रहँदा थ्री स्टारका लागि रुपेश केसीले गोल गरे । च्यासलका गोलरक्षक दिनेशले सुनील बलको क्रसमा रुपेशको हेडर बचाउने प्रयास गरेपनि अाफ्नै डिफेन्डर बाधक बने ।

खेलमा निर्णायक गोल गरेका थ्री स्टारका रुपेश केसी म्यान अफ द म्याच बने । उनले १० हजार रुपैयाँ प्राप्त गरे । विजयी टोलीका प्रशिक्षक उज्ज्वल मानन्धरले खेलाडीले निकै मिहिनेत गरेको कारण नै जित हासिल गरेको बताए । ‘लिगमा हाम्रो प्रदर्शन सन्तोषजनक रहेको थिएन । टोलीमा केहि परिवर्तन गरेका थियौं र आज डिफेन्स निकै बलियो भयो । अब अर्को खेलमा पनि यसै सिलसिला कायम राख्ने लक्ष्य हुनेछ,’ उनले भने ।

मोफसलकै सर्वाधिक धनराशी पुरस्कार भएको प्रतियोगिताको विजेताले २१ लाख रुपैयाँ प्राप्त गर्नेछ । उपविजेताले १० लाख प्राप्त गर्दा विधागत उत्कृष्टतर्फ प्रत्यक खेलाडीले १५ हजार रुपैयाँ पाउनेछन् । थ्री स्टारले फाइनल प्रवेशका लागि बुधबार मेची नेत्रालय काक्करभिट्टा फुटबल ट्रेनिङ सेन्टरको सामना गर्नेछ । मंगलबार अन्तिम क्वाटरफाइनलमा सीएमजी क्लब संकटाले क्यामरुनको दाफिनास एफसीको सामना गर्नेछ ।