सुबास हुमागाईं, धनगढी

नेपाली राष्ट्रिय फुटबल टोलीका डिफेन्डर अनन्त तामाङ सोमबार धनगढीमा रुस्लान थ्री स्टार क्लबबाट खेल्दै घरेलु फुटबलमा लामो समयपछि मैदानमा देखिएका छन् । धनगढी रंगशालामा जारी सुदूरपश्चिम खप्तड गोल्डकपको क्वाटरफाइनलमा थ्री स्टारले छिमेकी क्लब च्यासल युवा क्लबलाई पराजित गर्दा अनन्तको प्रदर्शन उत्कृष्ट रहयो ।

खेलपछि हाम्रोखेलकुदसँग बोल्दै अनन्तले मैदान फर्कंदा फेरी सास फर्केजस्तो अनुभूति भएको बताए । ‘लामो समय मैदानबाहिर बस्दा निकै कठिन हुने रहेछ । आफू फिट भएर खेल्न सक्ने हुँदापनि कागजी प्रक्रियामा गल्ति गर्दा मैले लिग खेल्न पाइन । अहिले मैदान फर्कंदा एकदम खुसी लागेको छ । ज्यानमा सास फर्केजस्तो भएको छ,’ अनन्तले मुस्काउँदै भने ।

राष्ट्रिय टोलीबाट पछिल्लो तीन वर्षयता नियमित पहिलो रोजाइमा खेल्दै आइरहेका अनन्तले ए डिभिजन लिग भने खेलेनन, अथवा भनौं खेल्न पाएनन् । मनाङ र थ्री स्टार दुवै क्लबसँग उनको अनुबन्धन रहेपछि उनले राजधानीमा सम्पन्न ए डिभिजन लिगभर दुई क्लब धाउँदै बिताए । उनले सानो गल्ति गर्दा महँगो मूल्य चुकाउनु पर्यो ।

पछिल्लो वर्ष मोफसलका प्रतियोगिताहरुमा अनन्तले थ्री स्टारबाट खेलेका थिए । त्यसअघि मनाङमा आबद्ध रहेका उनलाई लिगका लागि भने मनाङले पुन: क्लबमा फर्काउने प्रस्ताव राख्यो । मनाङले गरेको प्रस्ताव आकर्षक रहेकाले त्यसलाई स्वीकार्ने निर्णय गरे । यता थ्री स्टारले पनि उनीसँग सम्झौता भएको भनेपछि उनले थ्री स्टार फर्कने निर्णय गरे तर मनाङले त्यसो हुन दिएन ।

थ्री स्टारले आफूले फुकुवा नगरेको खेलाडी अन्य क्लबले अनुबन्धन गर्न नमिल्ने बताएपनि अनन्तले मनाङको प्रस्ताव स्वीकारेका कारण दुवै क्लबले एक अर्काबाट खेल्न दिएनन् । अनन्तका अनुसार उनले जुनै क्लबबाट भएपनि लिग खेल्न दुवै पक्षलाई आग्रह गरेपनि मनाङले त्यसो हुन दिएन ।

‘ मैले दुवै तर्फ मेरो सम्झौता भएको थाहा भएपछि दुवै पक्षलाई फुकुवाको लागि आग्रह गरें । दुवै क्लबले एक अर्काबाट खेल्न नदिने प्रष्ट पारेपछि जसरी पनि लिग खेल्नुपर्छ भन्ने थियो । अन्य कुनै क्लबबाट खेल्न दिन आग्रह गरें,’ उनले भने, ‘थ्री स्टारले स्वीकृति दिएपनि मनाङले भने अन्य क्लबबाट कुनै हालतमा खेल्न नदिने बतायो । पटक पटक मलाई सकारात्मक छलफलको लागि बोलाएपनि मलाई झुलाउने कार्यमात्र गर्यो ।’

अनन्तले आफूले गल्ति गरेको स्वीकारेपनि लिग खेल्न बन्चित गरेकोमा मनाङको बदनियतप्रति दुखेसो पोखे । ‘मैले गल्ति गरेको स्वीकारें । मनाङ र थ्री स्टार दुवै उपाधि दावेदार रहेका कारण मैले अन्य कुनै क्लबबाट लिग खेल्न दिन आग्रह गरें । मलाई खेल्न नदिने नै मनाङको नियत थियो । मलाई क्लबमा पटक पटक बोलाएर फुकुवा गर्ने भनेपनि क्लबका केहि प्रतिनिधिले झुलाउने कार्यमात्र गरे,’ उनले भने ।

लिगको दुई खेल बाँकी हुँदा मनाङको उपाधि पक्का भएपछि भने मनाङले उनलाई फुकुवा गरेको पत्र दियो । अनन्तले बाँकी दुई खेल चाहेर पनि खेल्न सकेनन् । नियमित प्रशिक्षण नभएको र मानिसक रुपमा पनि तयार नरहेका कारण उनले लिग नखेलेको बताए । ‘लिगको सातौं चरणसम्म पनि मैले लिगको आधा भाग खेल्छु भन्ने लागेको थियो । हरेक दिन क्लबको पदाधिकारीहरु सँग छलफलको प्रयास गरें । कहिले हुन्छ भन्ने आशा देखाए त कहिले क्लबमा नै बोलाए, तर फुकुवा गर्न मानेनन् । अन्त्यमा लिग उपाधि पक्का भएपछि फुकुवा गरिदिए । त्यसबेला २ खेल बाँकी थियो र मैले प्रशिक्षण पनि गरेको थिइन । नखेल्नु नै उचित हुने ठाने,’ अनन्तले सुनाए ।

झन्डै ५ वर्षपछि फर्किएको ए डिभिजन लिगमा अनन्तभन्दा जुनियर धेरै खेलाडीले खेले । अनन्तका समकालीन खेलाडीहरु टोलीका मुख्य खेलाडीका रुपमा अगाडी रहे । लामो समयपछि लिग भएका कारण उनीभन्दा सिनियर खेलाडी कमै मैदानमा देखिए । उनलाई आफू खेल्न नपाउँदा जति दुख थियो, त्योभन्दा बढी अन्य खेलाडीले खेलेको हेर्दा झस्काउँथ्यो ।

‘ सुरुको केहि चरण थ्री स्टारसँग प्रशिक्षणमा सामेल भएको थिएँ । खेल्न पाउने आशामा आफूलाई फिट राख्न प्रशिक्षणमा गएँ । मनाङले त्यसमा पनि रोक लगायो । खेल हेर्न जान पनि छाडें । घरमा एक्लै बस्दा निकै कठिन हुन्थ्यो । मध्यरात कटेपछि कतिबेला सुत्थें थाहा हुँदैन थियो । मानसिक रुपमा निकै तनाव भोगें,’ उनले दुखेसो पोखे ।

सोमबार धनगढी रंगशालामा पहिलो हाफदौरान नै उनको तिघ्रामा केहि समस्या आयो । फिजियोले मध्यान्तरमा मसाज गरेपछि उनले खेलको पुरै समय खेले । अनन्तको उपस्थितिले थ्री स्टारको डिफेन्स पनि बलियो देखियो । लिगदौरान उनको स्थान कप्तान विक्रम लामाले लिएका थिए । विक्रमले सोमबारको खेल आफ्नो नियमित पोजिसन सेन्टर मिडफिल्डमा खेले ।

लिगमा अनन्तको अनुपस्थितिका कारण क्लबको नतिजा केहि खस्किएको प्रशिक्षक मेघराज केसीले बताएका थिए । च्यासलविरुद्धको जितपछि प्रशिक्षक उज्ज्वल मानन्धरले अनन्तको प्रदर्शनको खुलेर प्रशंसा गरे । ‘ अनन्तको स्तर नै फरक छ । हामीले उनीबाट यस्तै प्रदर्शनको अपेक्षा गरेका छौं । आज उनको उपस्थितिले हाम्रो डिफेन्स राम्रो देखियो । उनीसँगै दिनेश राजवंशीको आगमनले हाम्रो रक्षापंक्ति थप बलियो भएको छ,’ मानन्धरले भने । नियमित प्रशिक्षक मेघराज केसी व्यक्तिगत कारणले काठमाडौं रहेका कारण मानन्धरले टोलीको जिम्मेवारी सम्हालिरहेका छन् ।

अनन्तले अब मोफसलका प्रतियोगितामा ध्यान दिएर आफ्नो क्लब करिअरलाई अगाडी बढाउने लक्ष्य राखेका छन् । उनले थ्री स्टारको लिगको प्रदर्शनलाई मोफसलमा उपाधि जित्दै बिर्साउने प्रण गरेक छन् । ‘ लिगमा हाम्रो प्रदर्शन राम्रो हुन सकेन । मोफसलमा धेरै प्रतियोगिता खेल्दैछौं । अब मोफसलको सफलताले लिगको नतिजा सुध्रन नसकेपनि समर्थक र क्लबलाई खुसी पार्न तत्पर छौं,’ उनले भने, ‘ सुदूरमा जारी मोफसलकै सर्वाधिक ठूलो प्रतियोगिताबाट जितको सिलसिला सुरु गर्ने लक्ष्य रहेको छ । टोलीमा केहि परिवर्तन भएको छ र थप बलियो भएको महसुस गरेको छु । मैदानमा फर्केको प्रतियोगितालाई सुखद अन्त्य गर्न आफ्नो सक्दो प्रयास गर्नेछु ।’