धनगढी (हाम्रो खेलकुद) – क्यामरुनको दाउफिन्स फुटबल क्लबलाई पराजित गर्दै सीएमजी क्लब संकटा तेस्रो नेपाल अाइस अन्तर्राष्ट्रिय सुदुरपश्चिम खप्तड गोल्डकपको सेमिफाइनलमा प्रवेश गरेको छ ‌। संकटाले १-० को  जित दर्ता गर्दा एलोन म्याक्स्वेलले गरेको निर्णायक सावित भयो ।

मंगलबार धनगढी रंगशालामा खेलको दोस्रो मिनेटमा नै एलोन म्याक्सवेलले गोल गर्दै संकटालाई अग्रता दिलाए । लक्ष्मण रुचालले दिएको थ्रु पासलाई उनले सहजै गोलमा परिणत गरेका थिए । खेलको १२ औं मिनेटमा लक्ष्मण रुचालले वन भर्सेस वनको स्थितिमा गरेको प्रहार गोलरक्षक गुर्लाउन्सले बचाए । पहिलो हाफको इन्जुरी समयमा दाउफिन्सका कप्तान जोसेफले पेनाल्टी क्षेत्रबाहिरबाट गरेको प्रहारले पोस्टको दिशा लिन सकेन ।

दोस्रो हाफको पाँचौं मिनेटमा दाउफिन्सले खेल बराबरी गर्ने मौका गुमायो । गोलरक्षक पोजिसनमा नहुँदा अार्मेलको क्रसमा जुनियरको हेडरले पोस्टको दिशा लिन सकेन । लगत्तै अर्कोतर्फ संकटाका फोफाना इब्राहिमको प्रहारलाई गोलरक्षक गुर्लाउन्सले सहजै बचाए । ५३ अौं मिनेटमा टिनाको क्रसमा नियाले ६ यार्ड बक्सभित्रबाट गरेको हेडर क्रसबारभन्दा थोरै माथिबाट बाहिरियो । खेलको दुई मिनेट समय बाँकी रहँदा जुनियरको पासमा टिनाको प्रहारले पोस्टको दिशा लिन सकेन ।

खेलमा उत्कृष्ट प्रदर्शन गरेका संकटाका कप्तान रवि सिलवालले म्यान अफ दि म्याच बन्दै १० हजार रुपैयाँ प्राप्त गरे । संकटाले अब बिहिबार हुने सेमिफाइनलमा नेपाल पुलिस क्लबको सामना गर्नेछ ।

पराजित टोलीका प्रशिक्षक आशिक थापामगरले लामो यात्रा तय गर्नुपरेको कारण टोलीले अपेक्षित प्रदर्शन गर्न नसकेको बताए । ‘ हाम्रो टोलीले लामो यात्रा तय गर्नुपर्यो । भिसामा पनि केहि समस्या हुँदा खेलाडी मानसिक रुपमा पनि थकित देखिए । त्यसैले पनि हामीले अपेक्षित प्रदर्शन गर्न सकेनौं,’ उनले थपे, ‘ हामीले २० खेलाडी भनेकोमा केहि खेलाडी आउन पाएनन् । टोली अपेक्षा गरेभन्दा केहि कमजोर प्रदर्शन गर्यो ।’

संकटाका प्रशिक्षक सल्यान खड्गीले खेलाडीले आफ्नो रणनीति अनुसार खेलेको कारण नै जित हासिल गरको बताए । ‘हाम्रो रणनीति सफल हुँदा जित हासिल गर्यौं । पहिलो हाफमा थप गोल निस्कने थियो । दोस्रो हाफमा हामीले रक्षात्मक रुपमा अग्रता बढाउने निर्णय गर्यौं र सफल भयौं,’ उनले भने ।

मोफसलकै सर्वाधिक धनराशी पुरस्कार भएको प्रतियोगिताको विजेताले २१ लाख रुपैयाँ प्राप्त गर्नेछ । उपविजेताले १० लाख प्राप्त गर्दा विधागत उत्कृष्टतर्फ प्रत्यक खेलाडीले १५ हजार रुपैयाँ पाउनेछन् । बुधबार हुने पहिलो सेमीफाइनलमा रुस्लान थ्री स्टार क्लब र मेची नेत्रालय काकरभिट्टा फुटबल ट्रेनिङ सेन्टर खेल्नेछन् ।