धनगढी (हाम्रो खेलकुद) – रुस्लान थ्री स्टार क्लब तेस्रो नेपाल अाइस अन्तर्राष्ट्रिय सुदुरपश्चिम खप्तड गोल्डकपको फाइनलमा प्रवेश गरेको छ ‌। बुधबार धनगढी रंगशालामा भएको पहिलो सेमिफाइनलमा मेची नेत्रालय काक्करभीट्टा फुटबल ट्रेनिङ सेन्टरलाई २-० ले पराजित गर्दै थ्री स्टारले उपाधि भिडन्त पक्का गरेको हो ।

रुस्लान थ्री स्टारले खेलको पहिलो हाफमा दबाब बनाएपनि गोल गर्न भने दोस्रो हाफ कुर्नुपरेको थियो । १४ अौं मिनेटमा सुनील बलको कर्नरमा रन्जन विष्टको प्रहार रिबाउन्ड भएपछि अडामा डुम्बियाले गरेको प्रहार काकरभिट्टाका गोलरक्षक दीप कार्कीले बचाए ।

२१ अौं मिनेटमा थ्री स्टारका फोडे फोफानाले पेनाल्टी क्षेत्रभित्रबाट गरेको प्रहारले पोस्टको दिशा लिन सकेन । ३२ अौं मिनेटमा फोफानाको प्रहार पोस्टभन्दा बाहिर जाँदा थ्री स्टार अग्रता लिनबाट चुक्यो । फोफानाले पाएको अवसर सदुपयोग गर्न नसक्दा पहिलो हाफ गोलरहित रहयो ।

दोस्रो हाफको ५३ अौं मिनेटमा थ्री स्टारको रुपेश केसीको भली प्रहार दीप कार्कीले बचाए । अर्कोतर्फ काक्करभिट्टाका एन्जल गुरुङको प्रहार अाकाशियो । ५५ अौं मिनेटमा रञ्जित धिमालको लो क्रसमा रन्जन विष्टको प्रहारले पोस्टको दिशा लिन सकेन । ६९ अौं मिनेटमा थ्री स्टारले अग्रता लियो ‌। रन्जन विष्टको क्रसमा बुद्ध चेम्जोङले दिएको हेडर पासमा ६ यार्ड बक्सभित्र अनमार्क रहेका रुपेश केसीले गोल गरे ।

८० अौं मिनेटमा थ्री स्टारले अग्रता दोब्बर पार्यो । सुनील बलले पेनाल्टी क्षेत्रको ठिक बाहिर प्राप्त फ्रिकिकमा सुन्दर गोल गरे ‌। विकास राईले रन्जन विष्टलाई पेनाल्टी क्षेत्रभित्र लडाएपछि रेफ्रीले राईलाई पहेंलो कार्ड देखाएका थिए ।

उत्कृष्ट प्रदर्शन गरेका थ्री स्टारका मिडफिल्डर सुनील बल खेलको म्यान अफ द म्याच भए । उनले १० हजार रुपैयाँ प्राप्त गरे । विजयी टोलीका प्रशिक्षक उज्ज्वल मानन्धरले लिगको पिडा बिर्साउन मोफसलमा सुखद सुरुवात गर्न तत्पर रहेको बताए । ‘हामीले लिगमा राम्रो प्रदर्शन गर्न सकेनौं । मोफसलमा सुखद सुरुवात गर्ने लक्ष्य थियो र त्यहि पथमा अगाडी बढेका छौं । आजको खेल कठिन थियो तर खेलाडीहरुले दोस्रो हाफमा अवसर सदुपयोग गर्दै जित पक्का गरे,’ उनले भने ।

यस जितसँगै थ्री स्टारले प्रतियोगिताको उपाधि भिडन्तमा आफ्नो स्थान पक्का गरेको छ । फाइनल खेल शनिबार हुनेछ । बिहीबार दोस्रो सेमिफाइनलमा सीएमजी क्लब संकटा र नेपाल पुलिस क्लब खेल्नेछन् ।

मोफसलकै सर्वाधिक धनराशी पुरस्कार भएको प्रतियोगिताको विजेताले २१ लाख रुपैयाँ प्राप्त गर्नेछ । उपविजेताले १० लाख प्राप्त गर्दा विधागत उत्कृष्टतर्फ प्रत्यक खेलाडीले १५ हजार रुपैयाँ पाउनेछन् ।