वीरगन्ज (हाम्रो खेलकुद)– ‘ए’ डिभिजन टोली हिमालयन शेर्पा क्लब वीरगन्जमा जारी दोस्रो विशाल स्मृति फुटबल प्रतियोगिताको फाइनलमा प्रवेश गरेको छ । वीरगन्जस्थित नारायणी रंगशालामा बुधबार भएको खेलमा शेर्पाले आयोजक वीरगन्ज–११ लाई पेनाल्टी सुटआउटमा ४–३ ले पराजित गर्दै उपाधिनजिक पुगेको हो ।

निकै नै रोमाञ्चक र प्रतिस्पर्धात्मक खेलको निर्धारित समयमा १–१ गोलको बराबरीमा टुंगिएको थियो । पेनाल्टी सुटआउटमा शेर्पाका गोलरक्षक किशोर गिरीले विपक्षीका दुई पेनाल्टी रोकेका थिए ।

शेर्पाका विजय श्रेष्ठ, विलिक सिवी, प्याट्रिक गोहा र रवि थापाले गोल गर्दा विश्वास श्रेष्ठको प्रहार बाहिरिएको थियो । वीरगन्जका कप्तान कृष्ण कार्की, शिसस थापा, कृपाकान्त चौधरीले गोल गरे । अरुज सिंह र सञ्जय चौधरीको प्रहारलाई शेर्पाका गोलरक्षकले बचाएका थिए ।

त्यसअघि पहिलो हाफ गोलरहित बराबरीमा सकिएको थियो । ५६औं मिनेटमा काजिम बुसारीले गोल गर्दै घरेलु टोलीलाई अग्रता दिलाएका थिए । तर, घरेलु टोलीले उक्त अग्रता अन्तिम समयसम्म जोगाउन सकेन । इन्जुुरी समयमा शेर्पाले बराबरी गोल फर्काएको थियो । वीरगञ्जका कृष्ण कार्की म्यान अफ दि म्याच घोषित भए ।

प्रतियोगिताको अर्को सेमिफाइनल बिहीबार झापा–११ र त्रिभुवन आर्मी क्लबबीच प्रतिस्पर्धा हुनेछ ।