धनगढी (हाम्रो खेलकुद) – विभागीय टोली नेपाल पुलिस क्लब र सीएमजी संकटा क्लब तेस्रो नेपाल आइस अन्तर्राष्ट्रिय सुदूरपश्चिम खप्तड गोल्डकपको दोस्रो सेमिफाइनलमा आमनेसामने हुँदैछन् । धनगढी रंगशालामा बिहीबार दिउँसो २:३० बजे हुने खेलको विजेताले उपाधिका लागि रुस्लान थ्री स्टारको सामना गर्नेछ ।
सीएमजी संकटाले प्रतियोगिताको पहिलो खेलमा गोर्खा ब्वाइज रुपन्देहीलाई २-० ले पराजित गर्दै क्वाटरफाइनलमा स्थान बनाएको थियो । त्यसपछि क्यामरुनको दाउफिन्स फुटबल क्लबलाई १-० ले पराजित गर्दै संकटाले अन्तिम चारमा स्थान पक्का गरेको थियो । संकटाले प्रतियोगितामा अहिलेसम्म गोल खाएको छैन । पहिलो खेलमा गोलरक्षक राजबाबु थापा म्यान अफ द म्याच भएका थिए भने दोस्रो खेलमा कप्तान तथा सेन्टर डिफेन्डर रवी सिलवाल उत्कृष्ट चुनिएका थिए ।
राजधानीमा गत साता सम्पन्न ए डिभिजन लिगमा उपविजेता बनेको संकटाले यस प्रतियोगिताका लागि केहि खेलाडी परिवर्तन गरेको छ । मिडफिल्डमा विष्णु गुरुङको अनुपस्थितिमा जय गुरुङले खेलिरहेका छन् भने सेड्रिक अबाको स्थानमा फोफाना इब्राहिम टोलीमा छन् । प्रशिक्षक सल्यान खड्गीले उपाधि जित्ने लक्ष्य लिएर धनगढी आएको बताएका छन् ।
नेपाल पुलिस क्लबले पछिल्लो खेलमा ए डिभिजन च्याम्पियन मनाङ मर्स्याङदीलाई १-० ले पराजित गर्दै सेमिफाइनलमा स्थान बनाएको हो । म्यान अफ द म्याच निरकुमार राईको एकमात्र गोलमा पुलिस सेमिफाइनल पुगेको हो । त्यसअघि पुलिसले मोरङ फुटबल क्लबलाई ३-० ले पराजित गरेको थियो । उक्त खेलमा म्यान अफ द म्याच तिर्थ रानाले ह्याट्रिक गरेका थिए ।
खेलमा पुलिसका लागि अभिषेक रिजाल, तेज तामाङ, विक्रम धिमाल लगायत खेलाडीले राम्रो प्रदर्शन गरिरहेका छन् । लिगमा औसत प्रदर्शन गरेको पुलसीले दिनेश राजवंशीलाई गुमाएको छ भने चोटका कारण केहि खेलाडी हाल टोलीमा छैनन् । पुलिसले मनाङलाई पराजित गरेपछि उपाधिमा आफ्नो बलियो दावेदारी प्रस्तुत गरेको छ ।
खेलको प्रत्यक्ष प्रसारण :
