काठमाडौं (हाम्रो खेलकुद)– टासी घले अखिल नेपाल फुटबल संघ (एन्फा) को मानार्थ अध्यक्षबाट बर्खास्त भएका छन् । बिहीबार बसेको एन्फा केन्द्रिय समिति बैठकले घलेलाई बर्खास्त गरेको हो ।
वैशाखमा नयाँ कार्यसमितिको चयन सँगै दोस्रो पटक मानार्थ अध्यक्ष बनेका घले झन्डै ८ महिनापछि बर्खास्तमा परेका हुन् । त्यसअघि नरेन्द्र श्रेष्ठको एक वर्षे कार्यकालमा पनि घले पहिलो पटक मानार्थ अध्यक्ष बनेका थिए ।
यसपटक मानार्थ अध्यक्ष चयन भएयता देखि नै घले र एन्फा अध्यक्ष कर्मा छिरिङ शेर्पालगायत अन्य पदाधिकारीबीच असमझादरी बढेको थियो । शेर्पालगायतको प्यानललाई निर्वाचनमा सघाएपछि घले मानार्थ अध्यक्ष बनेका थिए ।
बर्खास्त हुँदा घले भने देश बाहिर रहेका छन् । व्यक्तिगत विषयलाई सार्वजनिक गरेकोले घलेलाई कार्यसमितिले बर्खास्त गरेको एन्फा अध्यक्ष शेर्पाले बताए ।
