सुबास हुमागाईं, धनगढी

नेपाल पुलिस क्लबले बिहीबार धनगढीमा जारी खप्तड गोल्डकपको सेमिफाइनलमा सीएमजी क्लब संकटालाई टाइब्रेकरमा पराजित गर्दै प्रतियोगिताको फाइनलमा स्थान पक्का गर्यो । टाइब्रेकरमा पुलिसका लागि वैकल्पिक गोलरक्षक रोशन खड्काले संकटाका सुभाष गुरुङको पाँचौ प्रहार बचाएका थिए । त्यसपछि कप्तान विक्रम धिमालको गोलमा पुलिसले फाइनलमा स्थान पक्का गरेको थियो ।

टाइब्रेकरमा जित हासिल गरेपछि पुलिसका खेलाडी मात्र नभएर प्रशिक्षकहरु पनि मैदानमा आएर खुसियाली मनाएका थिए । स्वयं प्रशिक्षक अनन्त थापा पालैपालो आफ्ना खेलाडीलाई अंकमाल गरिरहेका देखिन्थे । पुलिसले कम्तिमा फाइनल पुग्ने लक्ष्य लिएर आएकोमा त्यो प्राप्त भएपछि खुसी मनाएको प्रशिक्षक थापाले बताए ।

‘खप्तड गोल्डकप यस पटक मोफसलको पहिलो प्रतियोगिता हो । मोफसलमा हामी सुखद सुरुवात गर्न चाहन्छौं । अझ यस प्रतियोगिता सर्वाधिक धनराशी पुरस्कारको प्रतियोगिता पनि हो । यसले पनि हाम्रा खेलाडीहरु थप हौसिएका छन् । विभागीय टोलीमा खेलाडीहरुलाई हौसला बढाउन यस्तो पुरस्कार राशीले ठूलो भूमिका खेल्छ,’ थापाले भने ।

पुलिसका प्रशिक्षक अनन्त थापाले इन्ज्युरी समयको दोस्रो मिनेटमा नियमित गोलरक्षक शत्रुघन चौधरीको स्थानमा रोशनलाई मैदान पठाएका थिए । रोशन पुलिसका तेस्रो रोजाइका गोलरक्षक हुन् । पुलिसले लिगमा उनलाई कुनै खेलमा मैदानमा उतारेको थिएन । दोस्रो रोजाइका रुपमा यू-१९ राष्ट्रिय टोलीका कप्तान अर्पण कार्कीले लिगको पछिल्लो खेलहरु खेलेका थिए ।

प्रशिक्षक थापाले तीनै गोलरक्षकलाई खेलको समय दिने कार्य निकै चुनौतीपूर्ण रहेको बताए । ‘हामीसँग ३ गोलरक्षक छन् । सबै राम्रो भएकाले कसलाई खेलाउने भन्ने निकै कठिन कार्य हो । अहिले शत्रुघनले राम्रो प्रदर्शन गरिरहेका छन् । अर्पणले लिगको पछिल्लो भागमा खेलेपनि पूर्ण सन्तुष्ट हुने प्रदर्शन थिएन,’ उनले भने ।

पुलिसले विभागका खेलाडीलाई नै एक्सपोजर दिएर दिर्घकालिन रुपमा टोलीलाई बलियो बनाउने लक्ष्य राखेको छ । प्रशिक्षक थापा विगतमा पनि पुलिसले विभागकै खेलाडीको भरमा सफलता हात पारेकाले त्यसलाई दोहोर्याउन अगाडी बढेको बताउँछन् । ‘विगतमा हामीले विभागकै खेलाडीको भरमा पुलिसलाई अब्बल टोली बनाएका थियौं । अब हाम्रो लक्ष्य त्यहि नै हुनेछ । विभागमा रहेका खेलाडीमा सम्भावना देखेर नै लगातार म्याच एक्सपोजर दिएका छौं । विभागीय भएपनि थ्री स्टार, मनाङजस्ता टोलीलाई लगातार चुनौती दिनेछौं,’ थापाले भने ।

पुलिसले अब फाइनलमा रुस्लान थ्री स्टार क्लबको सामना गर्दैछ । ए डिभिजन लिगमा पुलिसले थ्री स्टारलाई ३-१ ले पराजित गरेको थियो । प्रशिक्षक थापा यसपटक पनि सोहि नतिजा दोहोर्याउन तत्पर रहेको बताउँछन् । ‘हामीले लिगमा थ्री स्टारलाई सहजै पराजित गरेका थियौं । अहिले पनि हाम्रो टोली उस्तै नै छ । फाइनलका लागि खेलाडीहरु हौसिएका छन् । थ्री स्टार बलियो टोली हो तर फाइनलमा हामी जितका लागि खेनेछौं,’ उनले थपे ।

पुलिसको टोलीमा हाल दुई खेलाडी मात्र अनुबन्धनमा खेलिरहेका छन् । वैकल्पिक गोलरक्षक अर्पण कार्की र विंगर अभिषेक रिजाल पुलिसमा भर्ति भएका छैनन् । प्रशिक्षक थापाका अनुसार पुलिसले अब खेलाडी अनुबन्धन भन्दापनि पुलिस सेवाकै खेलाडीहरुलाई माथि ल्याउने प्रयासमा छ । ‘पुलिससँग आफ्नै मैदान छ । टोली पनि राम्रो छ । अब हामीले अन्य खेलाडी खोजेर वैकल्पिकमा पनि राम्रो खेलाडी खोज्नुपर्छ । लिगमा अपेक्षित प्रदर्शन हुन सकेन । मोफसलमा अब रम्रो सुरुवात गर्दै त्यसलाई निरन्तरता दिने प्रयास गर्नेछौं,’ उनले टुंग्याए ।

शनिबार हुने फाइनल खेलमा थ्री स्टारबाट लिगपछि पुलिस छाडेका डिफेन्डर दिनेश राजवंशीले खेल्नेछन् । पुलिसले फाइनलका लागि टोलीमा परिवर्तन गर्ने सम्भावना देखिन्न । यता थ्री स्टार भने विदेशी खेलाडीको प्रदर्शनमा सन्तुष्ट नहुँदा केहि परिवर्तन गर्ने सम्भावना देखिन्छ । मोफसलकै सर्वाधिक धनराशी पुरस्कार रहेको खप्तड गोल्डकप विजेताले २१ लाख रुपैयाँ प्राप्त गर्नेछ ।