धनगढी (हाम्रो खेलकुद) – रुस्लान थ्री स्टार क्लब र नेपाल पुलिस क्लब मोफसलकै सर्वाधिक धनराशी पुरस्कार रहेको तेस्रो नेपाल अाइस अन्तर्राष्ट्रिय सुदुरपश्चिम खप्तड गोल्डकपको फाइनलमा शनिबार भिड्दैछन् ।

प्रतियोगिताको पूर्वसन्ध्यामा आयोजित पत्रकार सम्मेलनमा दुवै टोलीका कप्तान एवं प्रशिक्षकले मोफसलको यात्रा सर्वाधिक ठूलो प्रतियोगिताको उपाधिसहित गर्ने लक्ष्य राखेको बताएका छन् । सेमिफाइनलमा सीएमजी क्लब संकटालाई टाइब्रेकरमा पराजित गर्दै फाइनल पुगेको पुलिसका कप्तान विक्रम धिमालले योजनाअनुसार खेल्दै उपाधि जित्ने बताएका छन् ।

‘ हामीले यहाँसम्म आइपुग्दा आफ्नो योजना अनुसार खेलेका छौं । फाइनलमा पनि त्यसलाई निरन्तरता दिंदै उपाधि जित्ने लक्ष्य राखेका छौं, ‘ उनले भने, ‘लिगको शीर्ष दुई टोलीलाई पराजित गर्दै फाइनल यात्रा तय गरेका छौं । युवा टोली भएकाले जोस छ र प्रशिक्षकको निर्देशन अनुसार मैदानमा प्रदर्शन हुँदा सफल भएका छौं ।’

पुलिसका प्रशिक्षक अनन्त थापाले मोफसलको सर्वाधिक धनराशीको प्रतियोगिताको फाइनल पुग्दा टोली हौसिएको बताए । ‘लिगमा अपेक्षित प्रदर्शन हुन सकेन । अहिले मोफसलको सर्वाधिक धनराशीको पुरस्कार रहेको प्रतियोगितामा फाइनल यात्रा तय गर्दा पुरै टोलीको मनोबल बढेको छ । फाइनलमा राम्रो प्रदर्शन गर्दै उपाधि जित्ने छौं, ‘ उनले थपे, ‘ हामीले एकरुपताको प्रदर्शन गरेका छौं । हरेक टोलीलाई दबाब राख्दै जित दर्ता गरेका छौं ।’ प्रशिक्षक थापाले लिगमा सहजै जित दर्ता गरेपनि थ्री स्टारविरुद्ध सहज रुपमा नलिने र सहज भएर खेल्ने पनि बताए ।

रुस्लान थ्री स्टारका कप्तान विक्रम लामाले अपेक्षा गरेअनुसार नतिजा हासिल गरिरहेको बताए । ‘ लिगमा हाम्रो प्रदर्शन राम्रो हुन सकेको थिएन । मोफसलमा हामीले राम्रो सुरुवात गर्ने लक्ष्य राखेका थियौं । यस प्रतियोगितालाई हामीले शिक्षाको रुपमा लिएका छौं । अब फाइनलमा उपाधि जितेर सुखद सुरुवात गर्न तत्पर छौं,’ उनले भने,’ पुलिस एकदम राम्रो टोली हो । पुलिस टोली उत्कृष्ट लयमा छ र राम्रो खेल्छ । फाइनल सहज पक्कै हुने छैन ।’

व्यक्तिगत रुपमा पनि मिडफिल्डमा खेल्न पाउँदा केहि सहज भएको उनले बताए । ‘ मैले लिगमा डिफेन्समा खेलेको थिएँ । अहिले मिडफिल्डमा खेलेपनि शत प्रतिशत खेल्न सकेजस्तो छैन  । चाँडै आफ्नो शत प्रतिशत दिएर टोलीलाई अझै योगदान दिने लक्ष्य छ,’ लामाले थपे ।

थ्री स्टारका प्रशिक्षक उज्ज्वल मानन्धरले विपक्षी भन्दा बढी मिहिनेत गरेर उपाधि जित्ने बताए । ‘फाइनल पुगेका छौं । लक्ष्य भनेको उपाधि जित्ने नै हो । विपक्षी टोलीभन्दा बढी मिहिनेत गर्दै नतिजा आफ्नो पक्षमा पार्ने प्रयास गर्नेछौं,’ उनले थपे, ‘टोलीको मनोबल उच्च रहेको छ । लिगको नतिजा बिर्साउनको लागि भएपनि हामीलाई यस उपाधि आवश्यक छ ।’ थ्री स्टारका व्यवस्थापक मुकेश नकर्मीले पनि राम्रो प्रदर्शन भइरहेकाले उपाधि जित्नेमा आशावादी रहेको बताए ।

शनिबार धनगढी रंगशालामा हुने प्रतियोगिताको फाइनल विजेताले २१ लाख रुपैयाँ प्राप्त गर्नेछ । उपविजेता टोलीले १० लाख रुपैयाँमा चित्त बुझाउनेछ । प्रतियोगिताको सर्वोत्कृष्ट खेलाडीले यामाहाको १ सय ५० सीसी मोटरसाइकल प्राप्त गर्दा विधागत उत्कृष्टतर्फ हरेकले १५ हजार रुपैयाँ प्राप्त गर्नेछन् ।