सुनिल गाउँले
सिमरा– नेपाल एपिएफ क्लब सिमरामा जारी रुस्लान सिमरा गोल्ड कपको क्वार्टरफाइनलमा पुगेको छ । विशाल मेमोरियल फाउन्डेसनलाई १–० ले हराउँदै विभागिय टोली एपिएफ सिमरा गोल्डकपको अन्तिम आठमा पुगेको हो ।
आशिष लामाले खेलको ३६ औं मिनेटमा गरेको गोल नै खेलको निर्णायक बन्यो । आशिष नै खेलको म्यान अफ दी म्याच बनेका थिए । एपिएफले आइतबार अर्को विभागिय टोली त्रिभुवन आर्मी क्लबसँग क्वार्टरफाइनल खेल्नेछ ।
नव जनजागृति युवा क्लबले आयोजना गरेको प्रतियोगिता दसौं संस्करणको पहिलो दिन बिहीबार आयोजक टोलीले मकवानपुरलाई हराउँदै सेमिफाइनलको यात्रा तय गरेको थियो । प्रतियोगितामा शनिबार ए डिभिजन टोली सिएमजी क्लब संकटा र सरस्वती युथ क्लबबीच प्रतिस्पर्धा हुनेछ ।
१२ माघ सम्म चल्ने प्रतियोगितामा ए डिभिजनका ७ सहित १० टोलीको सहभागिता छ । प्रतियोगिताको विजेताले ६ लाख र दोस्रो टोलीले ३ लाख रुपैयाँ प्राप्त गर्नेछ ।
