सुनिल गाउँले
सिमरा – त्रिभुवन आर्मी क्लबले रुस्लान सिमरा गोल्ड कपको सेमिफाइनलमा बुधबार आयोजक नवजनजागृति युवा क्लबको सामना गर्दैछ । आर्मी अर्को विभागिय टोली एपिएफलाई ४–२ हराउँदै प्रतियोगिताको अन्तिम चारमा पुगेको थियो ।
आर्मी प्रतियोगिताको साविक विजेता हो । मकवानपुर ११ लाई ३–० ले हराउँदै आयोजक टोली सेमिफाइनलमा पुगेको थियो । आजको खेल जितेमा आर्मी लगातार दोस्रो साता दोस्रो उपाधिको फाइनलमा पुग्नेछ । शनिबार आर्मीले विशाल मेरोरियल गोल्ड कपको उपाधि जितेको थियो ।
आर्मी र नवजनजागृति युवा क्लबको विजेताले सेमिफाइनलमा रुस्लान थ्री स्टार क्लब र हिमालयन शेर्पा क्लबमध्ये एकको सामना गर्नेछ । थ्री स्टार र हिमालयन शेर्पाबीच बिहीबार प्रतिस्पर्धा हुनेछ । गत वर्ष आर्मी र थ्री स्टारले फाइनल खेलेका थिए ।
शनिबार हुने दसौं संस्करणको सिमरा गोल्डकपको फाइनलको विजेताले ६ लाख र दोस्रो हुने टोलीले ३ लाख रुपैयाँ प्राप्त गर्नेछ ।
