इटहरी (हाम्रो खेलकुद)– विभागीय टोली त्रिभुवन आर्मी क्लब मदन भण्डारी स्मृति अन्तर्राष्ट्रिय इटहरी गोल्डकपको सेमिफाइनलमा प्रवेश गरेको छ ।
सुनसरीस्थित इटहरी रंगशालामा भएको क्वाटरफाइनल खेलमा आर्मीले साविकको विजेता ललितपुरको रुस्लान थ्री स्टार क्लबलाई पेनाल्टी सुटआउटमा ३–१ ले पराजित गर्दै इटहरी गोल्डकपको अन्तिम चारमा पुग्न सफल भएको हो ।
प्र्रतिस्पर्धात्मक बनेको खेलको निर्धारित समयको खेल १–१ को बराबरीमा पुगेपछि खेलको निर्णय पेनाल्टी सुटआउटबाट लिइएको हो । जसमा आर्मीले बाजी मारेको हो । पेनाल्टी सुटआउटमा आर्मीका भरत खवास, सन्तोष तामाङ र विवेक बस्नेतले गोल गरे । दीप लामाको प्रहार बाहरियो ।
थ्रीस्टारका कप्तान विक्रम लामाले मात्रै गोल गर्न सके । रजिन धिमाल, बुद्ध चेम्जोङ र रुपेश केसीको प्रहार आर्मीका गोलरक्षक विकेश कुथुले बचाए । उनी नै खेलको म्यान अफ दि म्याच घोषित भए । उनले जनही १० हजार रुपैया पाए ।
प्रतिस्पर्धात्मक बनेको खेलको पहिलो हाफ गोलरहित बराबरीमा सकिएपनि ५८औं मिनेटमा कप्तान भरत खवासले गोल गर्दै आर्मीलाई अग्रता दिलाएका थिए । कप्तान खवासले बिबेक बस्नेतको क्रस पासमा भरत हेडमार्फत गोल गरेका थिए ।
दोस्रो हाफमा मैदान प्रवेश गरेका थ्री स्टारका बुद्ध चेम्जोङको क्रसलाई डिफेन्डर अनन्त तामाङले ७१औ मिनेटमा गोल गर्दै खेललाई १–१ गोलको बराबरीमा ल्याएका थिए ।
यससँगै आर्मीले दुई दिन रुस्लान सिमरा गोल्डकपको फाइनलमा भोगेको हारको बदला लिएको छ । आर्मी थ्री स्टारसँग सडनडेथमा ७–६ ले पराजित भएको थियो ।
अब आर्मीले सेमिफाइनलमा मेत्री नेत्रालय काकरभिट्टा फुटबल ट्रेनिङको सामना गर्नेछ । विजेताले उपाधिसहित १६ लाख रुपैयाँ प्राप्त गर्नेछ ।
