एजेन्सी – म्यानचेस्टर युनाइटेडका कार्यवाहक प्रशिक्षक ओले गुनार सोल्सजरले प्रिमियर लिगको जनवरी महिनाको उत्कृष्ट प्रशिक्षकको उपाधि जितेका छन् । म्यानचेस्टर युनाइटेडमा सर एलेक्स फर्गुसनपछि सोल्सजर यो उपाधि हासिल गर्ने पहिलो प्रशिक्षक बनेका छन् ।
जोसे मोउरिन्होको बर्खास्तीपछि टोलीको जिम्मेवारी सम्हालेका सोल्सजरले १० मध्ये ९ खेलमा जित दर्ता गरेका छन् । उनले सिजनको अन्त्यसम्म मात्र टोलीको जिम्मेवारी सम्हाल्नेछन् । यद्यपी युनाइटेडले उनलाई नै स्थायी प्रशिक्षकको जिम्मेवारी दिने सम्भावना पनि प्रबल छ । जनवरीको उत्कृष्ट प्रशिक्षक बन्ने क्रममा उनले अन्य दावेदार बर्नलीका सन डाइस र साउथह्याम्पटनका राल्फ हासनहटललाई पछाडी पारे ।
जनवरीमा युनाइटेडले सम्भावित १२ मध्ये १० अंक जोडेको थियो । टोटेनहम, न्युकासल र ब्राइटनलाई पराजित गरेको युनाइटेडले बर्नलीविरुद्ध २-२ को रोमांचक बराबरी खेलेको थियो । यस नतिजासँगै युनाइटेडले शीर्ष ४ सँगको दुरीलाई २ अंकमा झारेको छ । मोउरिन्हो बर्खास्त हुँदा युनाइटेड ११ अंकले पछाडी रहेको थियो ।
‘हामी अंक तालिकाको माथि पुग्न चाहन्छौं । यो हाम्रो यात्राको सुरुवात मात्र हो । जति धेरै क्लब र खेलाडीसँग घुलमिल हुन सकिन्छ, त्यति नै सफलता हासिल गर्न सहज हुन्छ,’ प्रशिक्षक सोल्सजरले भने । ४५ वर्षीय सोल्सजर प्रिमियर लिगको उत्कृष्ट खेलाडी वा प्रशिक्षक उपाधि जित्ने पहिलो नर्वेली खेलाडी पनि बने ।
