एजेन्सी – स्पेनिस ला लिगा फुटबलमा आज राति एट्लेटिको मड्रिड र रियल मड्रिडबीच म्याड्रिड डर्बी हुँदैछ । खेल नेपाली समयअनुसार राति ९ बजेपछि एट्लेटिकोको घरेलु मैदानमा हुदैछ ।

ला लिगामा बार्सिलोना र रियलबीचको ‘एल क्लासिको’ पछि ‘मड्रिड डर्वी’ लाई पनि निकै महत्वका साथ हेरिने गर्दछ । ला लिगाको दोस्रो र तेस्रो स्थानमा रहेको यि दुई टोलीबीचको खेल प्रतिस्पर्धात्मक र रोमाञ्चक हुने अपेक्षा गरिएको छ ।

रियल घरेलु टोलीलाई पराजित गर्दै दोस्रो स्थानमा उक्लने योजनामा हुनेछ । रियलले जित दर्ता गरे एट्लेटिकोलाई १ अंकले पछि पार्दै दोस्रो स्थानमा उक्लने छ । समान खेलबाट एट्लेटिकोको ४४ तथा रियलको ४२ अंक रहेको छ ।

निकै नै खराव प्रदर्शनबाट गुज्रिरहेको रियलले पछिल्ला पाँच खेलमा भने हार बेहोर्नुपरेको छैन । कोपा डेल रे अन्तरगत गत बिहीबार राति शीर्षस्थानमा रहेको बार्सिलोनालाई १–१ को बराबरीमा रोक्न सफल रियल निकै आत्मविश्वासी देखिएको छ । रियलमा युवा खेलाडी भिनिसियस जुनियर, करिम बेन्जेमा र खलुका मोड्रिचले उच्च प्रदर्शन गरिरहँदा ग्यारेथ बेल, क्यासमिरो, मार्काे एसेन्सियो र टोनी क्रुस चोटबाट पुनरागमन गर्दै फिट हुने प्रयासमा छन् ।

यता, एट्लेटिकोले भने पछिल्लो पाँच खेलमा मिश्रित नतिजा निकालेको छ । ३ खेलमा जित हात पार्दा समान १–१ को हारको नतिजा निकालेको एट्लेटिको गत आइतबार रियल बेटिससँग अन्तिम समयमा गोल खादै १–० ले पराजित हुन पुगेको थियो ।

तर, यि दुई टोलीबीचको पछिल्लो १० खेलमा एट्लेटिको एक खेलमा मात्रै पराजित भएको छ । ५ खेलमा जित तथा ४ बराबरीको नतिजा छ । ला लिगामा भने एट्लेटिको घरेलु मैदानमा सन् २०१६ नोभेम्बर यता रियलसँग पराजित हुनुपरेको छैन ।

एट्लेटिकोले रियललाई पराजित गर्न सके शीर्षस्थानको बार्सिलोनासँगको अंक दुरी कम गर्नेछ । शीर्षस्थानको बार्सिलोनाको २२ खेलबाट ५० अंक रहेको छ । बार्सिलोनाले एथलेटिको बिल्वाओसँग सोमबार राति प्रतिस्पर्धा गर्दैछ ।