काठमाडौं (हाम्रो खेलकुद) – भारतको भुवनेश्वरमा जारी हिरो गोल्डकपअन्तर्गत शनिबारको दोस्रो खेलमा खेलमा आयोजक राष्ट्र भारतले इरानलाई १-० ले पराजित गरेको छ ।
कालिंगा रंगशालामा भारतको लागि खेलको ४८ औं मिनेटमा अन्जु तामाङले गरेको गोल निर्णायक सावित भयो । यससँगै भारत प्रतियोगितामा ३ अंक जोड्दै अंक तालिकाको दोस्रो स्थानमा रहेको छ । शीर्षस्थानमा ३ अंकसहित नै म्यानमार रहेको छ । गोलअन्तरको आधारमा म्यानमार अगाडी रहेको हो ।
यसअघि शनिबारै भएको पहिलो खेलमा नेपाल म्यानमारसँग ३-० ले पराजित भएको थियो । नेपालले पहिलो हाफमा १ र दोस्रो हाफमा २ गोल खाएको थियो । इरान र नेपाल दुवै अंकविहिन भएपनि गोलअन्तरको आधारमा नेपाल तालिकाको पुछारमा रहेको छ ।
प्रतियोगिताअन्तर्गत सोमबार नेपालले दोस्रो खेलमा भारतको सामना गर्नेछ । त्यसै दिन पहिलो खेलमा म्यानमार र इरान पनि भिड्नेछन् । नेपाल दोस्रो खेलमा पराजित भए फाइनल पुग्ने सम्भावना समाप्त हुनेछ । भारत भने जितसँगै फाइनल पुग्ने सम्भावना बलियो पर्न चाहन्छ ।
