एजेन्सी – स्पेनिस ला लिगा अन्तर्गत शनिबार राती रियल म्याड्रिडले एट्लेटिको म्याड्रिडलाई पराजित गर्दै दोस्रो स्थानमा उक्लिएको छ । एट्लेटिकोको घरेलु मैदानमा रियल ३-१ ले विजयी रह्यो ।
खेलको १६ अौं मिनेटमा रियलले क्यासेमिरोको गोलमा अग्रता लिएको थियो । सर्जियो रामोसको हेडरलाई क्यासेमिरोले पेनाल्टी क्षेत्रभित्रबाट दर्शनीय ढंगले गोलमा परिणत गरेका थिए । त्यसको ९ मिनेटमा नै एट्लेटिको खेलमा फर्कियो । एन्जल कोर्रियाको पासमा एन्टोइन ग्रिज्मनले गोल गर्दै खेल बराबरीमा ल्याए ।
पहिलो हाफको ३ मिनेट समय बाँकी रहँदा रियलले पुन: अग्रता कायम गर्यो । जोसे जिमिनेजले पेनाल्टी क्षेत्रभित्र गल्ती गरेपछि प्राप्त पेनाल्टीलाई रियलका कप्तान सर्जियो रामोसले गोलमा परिणत गरे ।
खेलको ७४ अौं मिनेटमा रियलले अग्रता दोब्बर पार्यो । वैकल्पिक खेलाडीका रूपमा मैदान प्रवेश गरेका ग्यारेथ बेलले लुका मोड्रिचको पासलाई सदुपयोग गर्दै रियलको जित सुनिश्चित गरे । खेलको १० मिनेट समय बाँकी रहँदा एट्लेटिको १० खेलाडीमा समेटियो । थोमस पार्टे दोहोरो पहेंलो कार्ड खाँदै बाहिरिएका थिए ।
यस जितसँगै रियलले लिगको अंक तालिकामा दोस्रो स्थान कब्जा गरेको छ । रियलले २३ खेलमा ४५ अंक जोडेको छ । दोस्रो स्थानमा रहेको एट्लेटिकोले समान खेलमा ४४ अंक बनाएको छ । शीर्षस्थानमा रहेको बार्सिलोनाले २२ खेलमा ५० अंक बनाएको छ ।
