एजेन्सी – इंग्लिस प्रिमियर लिग अन्तर्गत आइतबार टोटेनहम हट्स्परले लेस्टर सिटीलाई ३-१ ले पराजित गरेको छ ।
खेलको पहिलो हाफमा टोटेनहमले १-० को अग्रता लिएको थियो । ३३ औं मिनेटमा डाभीन्सन सान्चेजले घरेलु टोलीलाई अग्रता दिलाएका थिए । उनले क्रिस्टियन एरिक्सनको क्रसलाई सदुपयोग गर्दै हेडरमार्फत गोल गरेका थिए ।
दोस्रो हाफमा लेस्टरले खेल बराबरी गर्ने अवसर पाएपनि त्यसलाई सदुपयोग गर्न सकेन । जान भर्टोङघनले निक म्याडिसनलाई पेनाल्टी क्षेत्रभित्र लडाएको भन्दै रेफ्रीले पेनाल्टी दिएका थिए । फरवार्ड जेमी भार्डीले वैकल्पिक खेलाडीको रुपमा मैदान प्रवेश गरेको पहिलो टचमा प्रहार गरेको पेनाल्टी टोटेनहमका कप्तान ह्युगो लोरिसले बचाए ।
एरिक्सनले ६३ औं मिनेटमा पेनाल्टी क्षेत्रबाहिरबाट गोल गर्दै टोटेनहमको अग्रता दोब्बर पारे । ७६ औं मिनेटमा लेस्टरले गोल फर्कायो । पेनाल्टीमा चुकेका भार्डीले रिकार्डो परेराको क्रसमा गोल गर्दै अग्रता घटाए । तर लयमा रहेका कोरियाली फरवार्ड सन ह्युङ मिनले ९० औं मिनेटमा गोल गर्दै जित सुनिश्चित गरे ।
यस जितसँगै टोटेनहम अंक तालिकाको तेस्रो स्थानमा बलियो रहेको छ । स्पर्सको २६ खेलमा ६० अंक छ । चौथो स्थानको युनाइटेडको समान खेलमा ५१ अंक छ । दोस्रो स्थानको सिटीले भने समान खेलमा ६० अंक जोडेको छ ।
