काठमाडौं (हाम्रो खेलकुद)– एउटा प्रतियोयिगता खेल्ने स्वीकृति लिएर नेपाल आइपुगेको दाउफिन्स क्लब बुधबार चौथो प्रतियोगिता खेल्ने तयारीमा रहेको छ । यसै साता मनकामना केबुलकार पोखरा कपको उपाधि जितेको क्यामरुन क्लब भनिएको दाउफिन्सले आज धरानमा जारी बुढासुब्बा गोल्डकपमा नेपाल एपिएफ क्लबको सामना गर्दैछ ।

दाउफिन्सलाई नेपाल ल्याउन पहल गरेका व्यवस्थापक भनिएका सगुन तण्डुकारलाई टिम फर्काउन पत्रचार गरिएको अखिल नेपाल फुटबल संघ (एन्फा) का महासचिव इन्द्रमान तुलाधरले हाम्रो खेलकुदलाई बताएका थिए । एन्फाको पत्राचारका वावजुद दाउफिन्स बुढासुब्बा खेल्ने तयारीमा छ ।

तर एन्फाका मनार्थ उपाध्यक्ष रहेको किशोर राईको अध्यक्षतामा रहेको धरान फुटबल क्लबले सञ्चालन गरिरहेको बुढासुब्बामा दाउफिन्स खेल्ने क्रममा छ । तीन प्रतियोगिता खेलिसकेको र एन्फाले पनि नखेलाउन कुनै पत्रचार नगरेकोले दाउफिन्सले आजको खेल खेल्ने धरान फुटबल क्लबका अध्यक्ष राईले हाम्रो खेलकुदलाई बताए ।

नेपालको सर्वाधिक पुरस्कार राशीको सुदूरपश्चिम खप्तड गोल्ड कप खेल्ने स्वीकृति लिएको दाउफिन्सले त्यसपछि मदन भण्डारी इटहरी गोल्ड कप र त्यसपछि पोखरा कप खेलेको थियो । यसै साताबाट सुरु हुने तिलोत्तोमा गोल्डकपमा पनि दाउफिन्सको नाम खेल तालिकामा समावेश गरिएको छ ।