काठमाडौं (हाम्रो खेलकुद) – सन् २०२० मा जापानको टोकियोमा आयोजना हुने टोकियो ओलम्पिकअन्तर्गत महिला फुटबल प्रतियोगिताको छनोटको दोस्रो चरणमा नेपाल समूह ‘ए’ मा परेको छ ।

एसियाली फुटबल महासंघले बुधबार सार्वजनिक गरेको खेल तालिका अनुसार नेपाल छनोट चरणको दोस्रो राउन्डमा समूह ‘ए’ मा परेको हो । नेपालसँगै समूह ‘ए’ मा आयोजक म्यानमार, भारत र इन्डोनेसिया रहेका छन् ।

दोस्रो चरणको खेल अप्रिल १ देखि सुरु हुनेछ । नेपालले पहिलो खेलमा आयोजक म्यानमारसँग खेल्दै दोस्रो चरणको शुरुवात गर्नेछ । त्यसपछि नेपालले दोस्रो खेलमा भारत र तेस्रो खेलमा इन्डोनेसियाको सामना गर्नेछ ।

छनोटको अन्य दुई समूहमा पनि ४-४ टोली रहेका छन् । समूह ‘बी’ मा हङकङ, जोर्डन, भिएतनाम र आयोजक उज्बेकिस्तान रहेका छन् । समूह ‘सी’ मा भने इरान, फिलिपिन्स, चाइनिज टाइपेइ र आयोजक प्यालेस्टाइनले प्रतिस्पर्धा गर्नेछन् । प्रत्यक समूह शीर्ष टोलीले तेस्रो चरणका लागि छनोट हुनेछन् । तेस्रो चरणमा छनोट हुने तीन टोलीले अष्ट्रेलिया, चीन, उत्तर कोरिया, दक्षिण कोरिया र थाइल्याण्डसँग अन्तिम दुई स्थानका लागि प्रतिस्पर्धा गर्नेछन् । जापान आयोजकका रुपमा छनोट भइसकेको छ ।

नेपाल गत नोभेम्बरमा भएको पहिलो चरणको छनोटमा समूहको उत्कृष्ट तेस्रो टोली बन्दै दोस्रो चरणमा स्थान बनाएको थियो । छनोटमा अपराजित रहेको नेपालले भारत, म्यानमार र बंगलादेशसँग समान १–१ को बराबरी खेलेको थियो ।

नेपाली टोली हाल भारतमा जारी हिरो गोल्डकपमा व्यस्त छ । अर्को महिना नेपालमै आयोजना हुने पाँचौ महिला साफ फुटबल च्याम्पियनसिपको तयारीका लागि भारतमा चलिरहेको हिरो गोल्डकपमा नेपालले सहभागिता जनाएको हो ।