सुबास हुमागाईं, काठमाडौं
नेपाली राष्ट्रिय टोलीका मिडफिल्डर रोहित चन्दलाई इन्डोनेसियाको लिग च्याम्पियन क्लब पर्सिजा जाकार्ताले माग गरेको छ । नयाँ सिजनको सुरुवातमा रोहितको माग पूरा गर्न नसकेको भन्दै अर्का खेलाडी लिएपनि क्लबले अहिले उनलाई फिर्ता बोलाउने निर्णय लिएको हो ।
गत सिजन पर्सिजालाई इतिहासकै पहिलो लिग उपाधि दिलाउने क्रममा रोहित प्रतियोगिताकै सर्वोत्कृष्ट खेलाडी घोषित भएका थिए । पर्सिजाले नयाँ सिजनका लागि प्रशिक्षक परिवर्तन गरेसँगै रोहितलाई पनि नयाँ सम्झौता दिएको थिएन । इभान कोलेभले जिम्मेवारी सम्हालेपछि क्लबले ल्याएको उज्बेकिस्तानका मिडफिल्डर जाहोनगिर अब्दुमुमिनोभले अपेक्षित प्रदर्शन गर्न नसकेपछि क्लबले रोहितलाई बोलाउने निर्णय गरेको बुझिएको छ । रोहित बिहिबार इन्डोनेसिया प्रस्थान गर्दैछन् ।
पर्सिजाका प्रमुख कार्यकारी अधिकृत फेरी पौलुसले इन्डोनेसियाको संचारमाध्यमसँग बोल्दै रोहितलाई बोलाएको पक्का गरेका छन् । ‘ हाम्रो अनुबन्धनबारे यकिन रुपमा समझदारी हुन बाँकी छ । उनले क्लबमा आबद्ध हुने पक्का गरिसकेका छन् । उनले उज्बेकी मिडफिल्डरको स्थान लिने पक्का भएको छ,’ उनले बताए । पर्सिजाले रोहितलाई एएफसी कपको टोलीमा समावेश गर्ने पनि उनले पक्का गरे ।
रोहितको पर्सिजामा आबद्धतालाई उनकै एजेन्ट रतन मुस्तिकाबाट पनि पक्का भएको बुझिएको छ । रोहितले सिजनको अन्त्यपछि नेपालमै रहेर केहि समय बिताउँदै आएका थिए । पर्सिजाको समर्थकमाझ निकै लोकप्रिय रहेका रोहितको बहिर्गमनले क्लब निकै आलोचित हुँदै आएको थियो । समर्थकहरुले रोहितलाई फिर्ता बोलाउन क्लबलाई सामाजिक संजालमार्फत दबाब पनि दिएका थिए ।
