काठमाडौं (हाम्रो खेलकुद) – रुस्लान थ्री स्टार क्लब भुटानमा जारी जिग्मे दोर्जी वाङचुक मेमोरियल गोल्डकपको फाइनलमा प्रवेश गरेको छ । बुधबार भएको दोस्रो सेमिफाइनलमा थ्री स्टारले युनाइटेड ब्रदर्शलाई ३-२ ले पराजित गर्दै फाइनलमा स्थान पक्का गरेको हो ।
रुस्लान थ्री स्टारले खेलको १७ औं मिनेटमा दिनेश राजवंशीको गोलमा अग्रता लिएको थियो । लगत्तै रन्जन विष्टले २० औं मिनेटमा गोल गर्दै अग्रता दोब्बर पारे । युनाइटेडका लागि विशिष्ट सुब्बाले ३२ औं मिनेटमा गोल फर्काएपछि अग्रता घटेको थियो ।
खेलको ८२ औं मिनेटमा बुद्ध चेम्जोङले गोल गर्दै थ्री स्टारलाई पुन: २ गोलको अग्रता दिलाए । इन्ज्युरी समयको पहिलो मिनेटमा युनाइटेडले अर्को गोल फर्कायो । पिटर सेगुनले पेनाल्टी क्षेत्रभित्र ह्यान्ड गरेपछि प्राप्त पेनाल्टीमा सोनम लेप्चाले गोल फर्काएपनि थ्री स्टार जित दर्ता गर्न सफल रहयो ।
थ्री स्टारले अब उपाधि भिडन्तमा पारो फुटबल क्लबको सामना गर्नेछ । पारोले नेपालको त्रिभुवन आर्मी क्लबलाई १-० ले पराजित गर्दै फाइनलमा स्थान बनाएको थियो । फाइनल शुक्रबार हुनेछ ।
