दीपक न्यौपाने, बुटवल
मोफसलको चर्चित क्लब झापा-११ फुटबल क्लबलाई ५-० ले पराजित गर्दै दाउफिन्स फुटबल क्लब २१ औं तिलोत्तोमा गोल्डकप फुटबल प्रतियोगिताको सेमिफाइनलमा प्रवेश गरेको छ ।
पहिलो हाफमा १-० को अग्रता लिएको दाउफिन्सले दोस्रो हाफमा ४ गोल थपेको थियो । खेलको २६ औं मिनेटमा यानिकले दाउफिन्सलाई अग्रता दिलाएका थिए । पछिल्लो दुई प्रतियोगितामा उपाधि जितेको दाउफिन्स उपाधिमा ह्याट्रिक गर्ने दाउमा छ ।
दोस्रो हाफको सुरुवातमै टेंगाले दाउफिन्सको अग्रता दोब्बर पारे । ७३ औं मिनेटमा निसले गोल गर्दै ३-० को अग्रता दिलाए । त्यसको दुई मिनेटमा नै डीडर टिनाले झापालाई लज्जास्पद हारतर्फ डोर्याए । खेलको ८८ औं मिनेटमा बीइकले गोल गर्दै फराकिलो जित पक्का गरे । बीइक खेलको म्यान अफ द म्याच बन्दै १० हजार रुपैयाँ प्राप्त गरे ।
यस जितसँगै दाउफिन्सले सेमिफाइनलमा आयोजक रुपन्देही-११ सँगफाइनल भिडन्त पनि पक्का गरेको छ । बिहीबार च्यासल युवा क्लब र मनाङ मर्स्याङदी क्लबबीच खेल हुनेछ ।
